Выбары прэзідэнта 2020: стартавала выбарчая кампанія

Галасаванне адбудзецца 9 жніўня. Другі тур, калі ў ім будзе неабходнасць, пройдзе не пазней за 23 жніўня. Ужо сёння прэтэндэнты на пасаду Прэзідэнта могуць падаць у ЦВК дакументы для рэгістрацыі ініцыятыўнай групы. Апошні дзень – 15 мая. З 21 мая па 19 чэрвеня – час збору подпісаў.

Іван Талкач, намеснік загадчыка аддзела Цэнтральнай камісіі Беларусі па выбарах і правядзенні рэспубліканскіх рэферэндумаў: «Асноўным этапам выбарчай кампаніі з’яўляецца збор подпісаў выбаршчыкаў. Пасля збору подпісаў выбаршчыкаў на працягу 10 дзён ажыццяўляецца праверка подпісаў і прымаецца рашэнне, ці набрала асоба, якая вылучаецца, неабходную колькасць подпісаў. А іх павінна быць не менш за 100 тысяч. І ў выпадку, калі ўсе заканадаўчыя патрабаванні выкананыя, то чалавек становіцца паўнапраўным кандыдатам у Прэзідэнты РБ».

Вылучэнне кандыдатаў пройдзе з 20 чэрвеня па 4 ліпеня, а рэгістрацыя – з 5 па 14 ліпеня. Далей пачынаецца перадвыбарчая агітацыя. З 4 па 8 жніўня ў выбаршчыкаў будзе магчымасць прагаласаваць датэрмінова. А 9 жніўня ўчасткі для галасавання адкрыюцца для ўсіх грамадзян краіны.

ОНТ