Выстава да 110-годдзя паэмы Янкі Купалы «Магіла Льва» адкрыецца сёння ў Магілёве

Выстава «Яго Магілёвам назвалі...», прымеркаваная да 110-годдзя твора Янкі Купалы «Магіла Льва», адкрыецца сёння ў Магілёўскім абласным краязнаўчым музеі ім. А.Р. Раманава, паведамілі ва ўстанове культуры.

Тэматычная экспазіцыя прысвечана паэтычнаму ўвасабленню даўняга падання аб узнікненні горада Магілёва. Госці змогуць азнаёміцца з аўтэнтычнымі прадметамі з Дзяржаўнага літаратурнага музея Янкі Купалы, якія адлюстроўваюць шлях твора да чытача і яго прысутнасць у культуры нашай краіны. Дакументальны раздзел экспазіцыі пазнаёміць з паэтапнымі падзеямі асабістага і творчага шляху Янкі Купалы. Дапоўняць выставу экспанаты з Магілёўскага абласнога краязнаўчага музея ім. А.Р. Раманава і Магілёўскага мастацкага музея ім. П.У. Масленікава, а таксама працы магілёўскіх мастакоў.

Урачыстае адкрыццё экспазіцыі пройдзе а 15-й гадзіне. Яна будзе працаваць да 16 красавіка.

БЕЛТА