Выстава-дэгустацыя, конкурсы — гастранамічны фестываль «БульбаСаміт» і бліна-фэст пройдуць на Магілёўшчыне

Імправізаваная «буржуйка» і бліны з сапраўднай печы - аладкі, налістнікі з рознымі начыннямі, панкейкі. У гэтую суботу, 14 верасня, у аграгарадку Вялікая Машчаніца адбудзецца духмяны і смачны бліна-фэст «Бліны з навіны», арганізатарамі якога выступаюць Цэнтралізаваная клубная сістэма Бялыніцкага раёна і Машчаніцкі сельскі клуб.

У фестывалі, які праводзіцца з 2021 года, бяруць удзел не толькі жыхары аграгарадка, але і іншых вёсак раёна. У праграме - выстава-дэгустацыя, конкурс на самы смачны і самы арыгінальны блін, тэматычныя падворкі, вясёлыя забавы і шмат жывой музыкі. У рамках бліна-фэсту ўзнагародзяць лепшых хлебаробаў ААТ «Новая Друць», а таксама пераможцаў конкурсу дзіцячых твораў «Людзі ўзрасціўшых хлеб» і конкурсу дзіцячага малюнка «Блінаедзіца».

Па словах арганізатараў, галоўная ідэя правядзення бліна-фэсту - папулярызацыя працы работнікаў сельскай гаспадаркі, адраджэнне народных традыцый беларусаў, у тым ліку праз любімыя «бабуліны» рэцэпты.

З мэтай адраджэння і захавання традыцый нацыянальнай кухні праводзіцца на Магілёўшчыне і гастранамічны фестываль «БульбаСаміт». У дзень свята, якое сёлета запланавана на 17 верасня, у Быхаве разгорнуць працу «бульбяныя падворкі», пройдуць конкурсы: на хуткасную падрыхтоўку дранікаў «Дранік-батл», «Бульбяны банкет», «Бульбяны разгуляй» і «Народная дэгустацыя».

У кожным конкурсе вызначаць трох пераможцаў, якіх узнагародзяць дыпломамі і заахвочвальнымі прызамі. Дарэчы, удзельнічаць у іх можна як камандна, так і індывідуальна. Звычайна на фестываль у Быхаў з'язджаюцца вяскоўцы, працоўныя калектывы прадпрыемстваў і арганізацый усіх форм уласнасці, гаспадары аграсядзіб, кіраўнікі і работнікі сялянска-фермерскіх гаспадарак не толькі з Магілёўскай вобласці, але і з іншых рэгіёнаў Беларусі.

У Быхаўскім райвыканкаме, які з'яўляецца заснавальнікам «БульбаСаміта», нагадваюць, што заяўкі на фестываль прымаюцца да 13 верасня.

 СБ