«Я знайшла тое, што шукала: Беларусь - лепшая краіна». У Магілёве прайшла цырымонія прынясення Прысягі грамадзяніна

Урачыстая цырымонія прыняцця Прысягі грамадзяніна Рэспублікі Беларусь прайшла ў гісторыка-дэманстрацыйнай зале УУС Магілёўскага аблвыканкама.

Грамадзянамі нашай краіны сталі ўраджэнцы Арменіі, Малдовы і Расіі. Усе яны жывуць у Кастрычніцкім раёне Магілёва. Ва ўрачыстай абстаноўцы, у асяроддзі супрацоўнікаў УУС і родных яны вымавілі словы клятвы, даўшы абяцанне выконваць і паважаць Канстытуцыю, абараняць незалежнасць, суверэнітэт і тэрытарыяльную цэласнасць нашай краіны, а таксама быць патрыётамі, захоўваць гістарычную памяць, паважаць годнасць, правы, свабоды і законы іншых.

Сярод тых, хто атрымаў грамадзянства, - ураджэнка Малдовы Віорыка Сталбунова. У Беларусі жанчына пражывае з 2009 года, а прычынай пераезду стала каханне. «Прычынай пераезду стала замужжа, мой муж - карэнны магіляўчанін. Мы пазнаёміліся з ім на маёй радзіме, а ўжо праз год згулялі вяселле. І ведаеце, мне вельмі павезла, - падзялілася жанчына. - Я акрамя Малдовы пажыла ў Расіі, потым вярталася на радзіму ненадоўга. Але мне падаецца, толькі тут, у Магілёве, я знайшла тое, што шукала. Беларусь - гэта лепшая краіна, з якой я ніколі не з'еду. Тут усе мае родныя і сям'я, мая праца, сябры. Тут я хатку ў вёсцы сабе купіла. Тут усё для мяне роднае».

Жанчына расказала, што збіраць дакументы для атрымання беларускага грамадзянства пачала яшчэ ў 2012 годзе. «Працэс зацягнуўся, часта ўзнікалі перашкоды з малдаўскага боку. Працэдура была няпростая, але я дайшла да пастаўленай мэты», - падзялілася яна.

Такая цырымонія, падкрэсліла Віорыка Сталбунова, вельмі радасная, але ў той жа час хвалюючая. «Цяжка падабраць словы, каб апісаць вам, што адбываецца ў мяне ў душы - гэта шчасце. Ведаеце, калі патэлефанавалі і сказалі, што мне надалі грамадзянства Рэспублікі Беларусь, я нават адказаць нічога не змагла. Гэта была цэлая бура пачуццяў. Я прайшла доўгі шлях, каб стаць часткай вялікай беларускай сям'і. Грамадзянін Беларусі - гучыць ганарліва. І гэтак жа ганарліва я буду казаць усім, што я грамадзянка гэтай краіны».

Як адзначыў падчас цырымоніі намеснік начальніка Кастрычніцкага РАУС Магілёва - начальнік міліцыі грамадскай бяспекі Уладзімір Пугачоў, словы клятвы - гэта не толькі прыгожая цырымонія, але і вялікая адказнасць. «Сёння вы прысягнулі на вернасць нашай дзяржаве і зараз нясеце адказнасць не толькі за сябе, але і краіну. Вы прайшлі сур'ёзны шлях у сваім жаданні стаць грамадзянамі нашай краіны. Я ўпэўнены, што сваімі дзеяннямі вы пацвердзіце гордае званне грамадзяніна Беларусі», - сказаў ён.

Па словах начальніка ўпраўлення па грамадзянстве і міграцыі УУС Магілёўскага аблвыканкама Пятра Сімончыка, сёлета беларускае грамадзянства атрымалі 380 жыхароў Магілёўскай вобласці. «Сярод іх ёсць ураджэнцы Украіны, Азербайджана, Арменіі, Расіі, В'етнама, Грузіі, Егіпта, Ірака, Ірана, Казахстана, Кыргызстана, Латвіі, Літвы, Малдовы, Сірыі, Таджыкістана і іншых дзяржаў. І працэс разгляду заяў ад замежнікаў працягваецца, на разглядзе знаходзіцца вялікая колькасць дакументаў, - адзначыў ён. - Людзі прыязджаюць у Беларусь па розных прычынах. Многія ўцякаюць ад ваенных канфліктаў у пошуках спакойнага і мірнага жыцця. І Беларусь гатова даць людзям магчымасць жыць, развівацца, будаваць свае сем'і ў нас».

Практыка прынясення такой прысягі для Магілёўскай вобласці зараз традыцыя. У якасці месцаў правядзення цырымоній выбіраюць знакавыя і важныя месцы. Сярод іх - помнік батальёну капітана К.Г.Уладзімірава.

Для людзей, якія атрымліваюць беларускае грамадзянства, упэўнены Пётр Сімончык, такая цырымонія мае важнае значэнне. «Яны свядома захацелі стаць грамадзянамі нашай краіны, прайшлі вялікі шлях для дасягнення гэтай мэты. І такая цырымонія падкрэслівае значнасць гэтай падзеі», - падсумаваў ён.

БЕЛТА