За 9 месяцаў 2020 года ў Магілёўскай вобласці на пажарах загінула 67 чалавек

За 9 месяцаў гэтага года ў Магілёўскай вобласці адбылося 588 пажараў, загінула 67 чалавек. Пра гэта карэспандэнту сайта паведаміла старшы інспектар абласнога ўпраўлення МНС Вольга Нехарошых.

Прычым жыцці 53 чалавек абарваліся праз неасцярожнае абыходжанне з агнём. Пагаршальны фактар –алкаголь. Больш за 70 % з ліку загінулых на момант пажару знаходзіліся ў стане алкагольнага ап’янення.

Вольга Нехарошых дадала: толькі за выхадныя ў вобласці адбылося 8 пажараў. На жаль, не абышлося без гібелі.

Так, 9 кастрычніка каля 6.00 па тэлефоне «101» патэлефанавалі ўсхваляваныя жыхары дзевяціпавярховага жылога дома па вул. Маўчанскага. З акна 7 паверха ішоў густы дым. Гарэла трохпакаёвая кватэра, якая належыць 54-гадоваму адзінокаму мужчыну. Яго ў непрытомным стане знайшлі на падлозе ў падпаленым пакоі. Атрыманыя траўмы аказаліся несумяшчальнымі з жыццём –мужчына загінуў. У выніку пажару ў пакоі пашкоджана маёмасць, закураны сцены і столь. Паводле папярэдніх даных, у здарэнні вінаватая непатушаная цыгарэта.

Ледзь не стаў ахвярай агню і 47-гадовы жыхар Краснаполля. Так, 12 кастрычніка каля 3.00 у службу МНС паступіла паведамленне аб пажары ў адной з кватэр у двухпавярховым жылым доме па вул. Чэрыкаўскае шасэ. Гарэла двухпакаёвая кватэра на другім паверсе. Ратавальнікі на лесвічнай клетцы другога паверха выявілі і вынеслі на свежае паветра гаспадара кватэры (інваліда другой групы). З папярэднім дыягназам «атручэнне прадуктамі гарэння» ён быў шпіталізаваны. У выніку пажару ў пакоі пашкоджана маёмасць, закураны сцены і столь. Ва ўзнікненні і гэтага пажару прасочваецца цыгарэтны след.

«Незатушаная цыгарэта, у адрозненне ад спадарожных курэнню хвароб, забівае імгненна, – падкрэсліла Вольга Нехарошых. – Знайдзіце сілы завязаць з гэтай згубнай звычкай. Калі не атрымліваецца, то паліце бяспечна – у спецыяльна адведзеных месцах. У прыватным доме – гэта вуліца, у кватэрах –балконы, але ў абодвух выпадках недакуркі трэба гасіць да апошняй іскры і ў попельніцы, а лепш за ўсё ў металічнай банцы, напоўненай вадой. Беражыце сябе і сваіх блізкіх!»