Рус Бел Eng 中文

За святочныя дні ў Магілёўскай вобласці адбылося 13 пажараў, адзін скончыўся гібеллю мужчыны

За святочныя дні ў Магілёўскай вобласці адбылося 13 пажараў. Адзін скончыўся гібеллю мужчыны, паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

Літаральна 10 гадзін не дажыў да Новага года 83-гадовы бабруйчанін, які пражываў у прыватным жылым доме па вул. Яловікі. У службу МНС каля 12.00 патэлефанавалі суседзі – гарэў дах, вырываўся дым і з вокнаў жылля. Ратавальнікі на падлозе ў пакоі знайшлі і вынеслі на свежае паветра гаспадара. На жаль, усе рэанімацыйныя дзеянні аказаліся дарэмнымі – мужчына загінуў. Прычына пажару ўстанаўліваецца. Мяркуецца, што справакаваць узгаранне магло парушэнне правілаў эксплуатацыі газавых прылад і агрэгатаў.

Днём 31 снежня 80-гадовая жыхарка Дрыбіна, якая жыве ў прыватным жылым доме па вул. Калгаснай, вырашыла памыць бялізну. А паколькі таз знаходзіўся ў каморы, шукала яго, падсвятляючы запалкамі. Па ўсёй бачнасці, ад незатушанай запалкі і пачалося гарэнне, заўважыўшы якое гаспадыня паспяшалася эвакуявацца, а суседзі патэлефанавалі ратавальнікам. У выніку пажару пашкоджана веранда, закурана маёмасць у доме. Цяпер пенсіянерка будзе пражываць у дачкі ў Горках.

Без святочнага стала і без даху над галавой у навагодні вечар засталася і 54-гадовая жыхарка в. Плешчыцы Шклоўскага раёна. Пажар адбыўся 31 снежня каля 21.00. У выніку пашкоджаны дах, перакрыцце і маёмасць у доме. Сама гаспадыня не пацярпела. Мяркуецца, што пажар адбыўся праз парушэнне правілаў эксплуатацыі печы.

Старая добрая традыцыя 31 снежня хадзіць у лазню прывяла ў гэты дзень да пажару трох лазняў. Каля 15.00 дня пад агністы ўдар трапіла прыватная лазня ў в. Дзягавічы Крычаўскага раёна. Каля 19.00 крычаўскія ратавальнікі ліквідавалі ўзгаранне лазні ў в. Бацвінаўка. Прыкладна ў гэты ж час загарэлася лазня, якая належала 63-гадовай жыхарцы в. Дзмітрыеўка-2 Клічаўскага раёна. Як мяркуецца, усе лазневыя пажары адбыліся праз парушэнне правілаў эксплуатацыі печаў.

Пры выкарыстанні матэрыялаў актыўная гіперспасылка на mogilev-region.gov.by абавязковая