Забарона на наведванне лясоў уведзена ў васямнаццаці раёнах Магілёўскай вобласці

Забарона на наведванне лясоў уведзена ў 18-ці з 21 раёна Магілёўскай вобласці. Адпаведныя меры дзейнічаюць у Глускім, Клічаўскім, Краснапольскім і Чавускім раёнах з 25 красавіка, а ў Бялыніцкім, Бабруйскім, Горацкім, Дрыбінскім, Клімавіцкім, Касцюковіцкім, Круглянскім, Магілёўскім, Мсціслаўскім, Асіповіцкім, Слаўгарадскім, Хоцімскім, Чэрыкаўскім і Шклоўскім раёнах – з сённяшняга дня, паведамляецца на сайце Міністэрства лясной гаспадаркі.

«У сувязі з гарачым і сухім надвор’ем, узнікненнем высокай пажарнай небяспекі ўведзена забарона на наведванне лясоў грамадзянамі, а таксама ўезд транспарту, за выключэннем службовага, – удакладнілі ў ведамстве. – Парушальнікам гэтай забароны можа пагражаць папярэджанне або штраф да 25 базавых велічынь».

Паколькі ў многіх раёнах Беларусі бушуюць лясныя пажары, Мінлясгас размясціў на сваім сайце карту забаронаў і абмежаванняў на наведванне лясоў. Яна абнаўляецца ў пастаянным рэжыме. Мясцовыя органы ўлады будуць аператыўна здымаць забароны, як толькі пройдуць дажджы.

Зараз ва ўсіх раёнах Магілёўскай вобласці адзначаецца 4 клас пажарнай небяспекі. Прымяняюцца экстранныя меры. Лясная ахова перайшла на ўзмоцнены рэжым працы. Дзяжурствы працягваюцца да 24.00. Зрабілі мінералізаваныя палосы. Кантраляваць абстаноўку дапамагае відэафіксацыя на пажарна-назіральных вышках.

Як праінфармавалі ў абласным упраўленні МНС, за мінулыя суткі ратавальнікі два разы выязджалі на тушэнне лесу, 1 – на тушэнне торфу. Работнікі ДЛГУ ліквідавалі 3 лясныя пажары ў Бабруйскім, Клічаўскім і Хоцімскім раёнах.

Супрацоўнікі МНС заклікаюць людзей быць вельмі асцярожнымі з агнём: не падпальваць сухую траву на палях і лясных палянах, не разводзіць вогнішчы на тарфяніках, не выкідваць непатушаныя недакуркі. Аб узгаранні трэба паведамляць у дзяжурную службу МНС па тэлефонах 101 і 112.