Запальны «Бульба-дэнс» прадставіць Магілёўская вобласць на «Марафоне адзінства» ў Гомелі

Магілёўская вобласць прадставіць на «Марафоне адзінства» ў Гомелі палымяны нумар з нацыянальным каларытам. У яго аснове - музычная кампазіцыя магіляўчанкі Ангеліны Волкавай «Бульба-дэнс», распавёў начальнік упраўлення культуры Магілёўскага аблвыканкама Аляксандр Жыгун.

«На сцэну выйдуць 86 юных магілёўскіх артыстаў - прадстаўнікі ўзорнага харэаграфічнага ансамбля «Кужалёк» і заслужанага аматарскага калектыву Беларусі ўзорнага эстраднага тэатра-студыі «Радуга» Магілёўскага абласнога цэнтра творчасці, - сказаў Аляксандр Жыгун. - Саліраваць будзе юная зорачка беларускай эстрады Ангеліна Волкава. Гледачоў чакае сучасны маладзёжны нумар, прысвечаны нашаму галоўнаму нацыянальнаму прадуктоваму брэнду - бульбе, якая ў жыцці кожнага беларуса адыгрывае важную ролю. Гэта будзе масавы, завадны і максімальна пазітыўны выступ».

Удзельнікамі нумара стануць дзяўчынкі і хлопчыкі ад 7 да 14 гадоў. Юныя артысты будуць паказваць бульбачку на градках, а хлопцы ў ігравой форме выкопваць і збіраць ураджай. Сцэнічнае дзейства будзе выканана па ўсіх законах харэаграфіі і беларускага народнага танца «Бульба».

Кіраўнік харэаграфічнага ансамбля «Кужалёк» Марына Прохарава падкрэсліла, што нумар «Бульба-дэнс» абавязкова парадуе гледачоў яркімі эмоцыямі. «Зрабіць такі выступ нам прапанавалі мінскія рэжысёры, таму што ў нашага калектыва ёсць пастаноўка пра бульбу, якую мы прадставім у сучаснай апрацоўцы - весела і палымяна, - патлумачыла яна. - Атрымаўся цікавы нумар з вялікай колькасцю дзяцей. Мы яго вельмі любім: удзельнікі калектыву з задавальненнем выконваюць, а гледачы прымаюць на ўра».

Дарэчы, магілёўскія калектывы ў тым жа складзе выступяць на святочнай сцэне «Марафона адзінства» ў Жлобіне. Творчасць выканаўцаў Магілёўскай вобласці таксама ўбачаць гледачы з іншых рэгіёнаў нашай краіны, дзе запланавана правядзенне патрыятычнай акцыі.

Аляксандр Жыгун падкрэсліў, што «Марафон адзінства» - праект, які мае магутны патрыятычны і аб'яднаўчы пасыл. Акрамя таго, ён накіраваны на ўмацаванне ў краіне адзінай культурнай прасторы, калі калектывы з розных рэгіёнаў абменьваюцца творчасцю, выходзяць на адну сцэну і разам дораць свой унікальны талент гледачу. «У гэтым і заключаецца сутнасць нашага беларускага менталітэту, бо мы заўсёды адзін аднаго падтрымліваем і дапамагаем ва ўсім: разам працуем і ствараем, разам весялімся, спяваем і танчым, разам радуемся мірнаму небу над галавой», - сказаў на заканчэнне ён.

БЕЛТА