Жыхарам Магілёўскай вобласці 6 снежня прапануюць далучыцца да акцыі «Дзень посткросера»

Жыхарам Магілёўскай вобласці прапануюць далучыцца да акцыі «Дзень посткросера», якая пройдзе ва ўсіх аддзяленнях паштовай сувязі Беларусі 6 снежня. Пры адпраўцы больш за 10 паштовых картак кліенту дадуць зніжку 10%, паведамілі ў прэс-цэнтры РУП «Белпошта».

Посткросінг – гэта міжнародны анлайн-праект, у межах якога незнаёмыя адзін з адным людзі з розных частак планеты абменьваюцца паштовымі карткамі і маркамі. Яго дэвіз – «Сюрпрыз у вашай паштовай скрыні».

Далучыўшыся да праекта, чалавек атрымлівае магчымасць пазнаёміцца са славутасцямі іншых краін і гарадоў, папрактыкаваць замежныя мовы і знайсці сяброў па ўсім свеце.

Каб стаць часткай міжнароднага руху, трэба зарэгістравацца на сайце postcrossing.com. Далей у выпадковым парадку посткросеру выдадуць пяць адрасоў з розных кропак свету, куды трэба адправіць карткі. У адказ прыйдуць паштовыя прывітанні ад такіх жа ўдзельнікаў праекта з краін блізкага і далёкага замежжа.

Заснавальнікам праекта і стваральнікам сайта postcrossing.com з’яўляецца партугалец Паола Магаляэш. Ён вельмі любіў атрымліваць і адпраўляць папяровыя лісты, напісаныя ад рукі.

Анлайн-праект налічвае 209 краін-удзельніц, каля 800 тысяч удзельнікаў, якія атрымалі 54 мільёны паштовых картак. Паштоўкі з розных кропак планеты прайшлі адлегласць, роўную 6 826 727 кругам вакол зямнога шара – гэта 277 358 313 207 км.

У рэйтынгу краін-удзельніц па колькасці посткросераў і колькасці адпраўленых паштовак Беларусь займае 8-е месца – больш за 30 тысяч беларусаў адправілі ўжо 2 277 222 паштоўкі.