Жыхароў Магілёўскай вобласці запрашаюць прыняць удзел у акцыі «Тыдзень лесу»

Жыхароў Магілёўскай вобласці запрашаюць прыняць удзел у акцыі «Тыдзень лесу». Традыцыйнае мерапрыемства адбудзецца 3–10 красавіка, як паведамілі ў Магілёўскім дзяржаўным вытворчым лесагаспадарчым аб’яднанні.

Па словах суразмоўцаў, у лясгасах рэгіёна будуць падрыхтаваны спецыяльныя аб’екты, на якіх добраахвотнікам дадуць магчымасць пасадзіць дрэвы, добраўпарадкаваць тэрыторыю, прыняць удзел у навядзенні парадку ў лесе, стварыць памятную алею або закласці дэндрапарк. «Кожны зможа выбраць, якім чынам унесці свой уклад у справу захавання і памнажэння лясных багаццяў рэспублікі, – падкрэслілі суразмоўцы. – Арганізацыі лясной гаспадаркі забяспечаць усіх пасадачным матэрыялам і прыладамі працы».

Дадатковую інфармацыю па акцыі можна атрымаць у абласным арганізацыйным камітэце па тэлефонах (80222) 75 05 70, 74 94 71.

Штогод да мерапрыемства далучаецца ўсё большая колькасць жыхароў Прыдняпроўскага краю. У акцыі таксама прымаюць актыўны ўдзел прадстаўнікі Савета Міністраў, дэпутацкага корпуса, кіраўнікі розных міністэрстваў і ведамстваў, абласных і раённых выканаўчых камітэтаў, грамадскіх арганізацый, бізнес-супольнасцяў. У 2020 годзе ў Магілёўскай вобласці падчас «Тыдня лесу» высадзілі каля 2,7 млн. саджанцаў асноўных лесаўтваральных парод. У праекце прыняло ўдзел больш за 6,7 тыс. жыхароў рэгіёна. Новы лес быў створаны на плошчы 573 га. Асноўнымі пародамі традыцыйна сталі хвоя, елка і бяроза. Таксама добраахвотнікі правялі ачыстку ад захламленасці лесу, прыбраўшы 900 куб. м смецця, адрэстаўравалі 60 месцаў адпачынку.

Акцыя «Тыдзень лесу» праводзіцца з 2007 года па ініцыятыве Міністэрства лясной гаспадаркі пры ўдзеле Упраўлення справамі Прэзідэнта Рэспублікі Беларусь, Міністэрства абароны Рэспублікі Беларусь, аблвыканкамаў, Беларускага таварыства лесаводаў і іншых арганізацый на землях ляснога фонду Беларусі. Сёлета яна адбудзецца ўжо 14-ым разам і будзе прымеркавана да Года народнага адзінства. Акрамя таго, сёлетні год у лясной галіны праходзіць пад знакам Года лясных культур. Як адзначаў раней міністр лясной гаспадаркі Віталь Дрожжа, ён павінен стаць пераломным у пытаннях лесааднаўлення. У прыватнасці, гаворка ідзе аб павышэнні якасці стварэння лясных культур.

Рэд.