Жыхары Магілёўскай вобласці паказалі высокую выбарчую актыўнасць – аблвыбаркам

Жыхары Магілёўскай вобласці паказалі ў гэтай палітычнай кампаніі высокую выбарчую актыўнасць. Выніковая яўка ў рэгіёне перавысіла адзнаку ў 90% ад спісачнай колькасці выбаршчыкаў і была вышэйшай, чым на папярэдніх прэзідэнцкіх выбарах. Пра гэта паведаміў старшыня Магілёўскай абласной выбарчай камісіі Валерый Берастаў.

«У Магілёўскай вобласці выбары прайшлі на добрым арганізацыйным узроўні, без істотных парушэнняў, – адзначыў суразмоўца. – Як старшыня абласной выбарчай камісіі, я быў прыемна здзіўлены высокай актыўнасцю жыхароў рэгіёна як падчас датэрміновага галасавання, так і ў асноўны дзень галасавання. Напрыклад, правам датэрміновага галасавання скарысталася больш за 49% выбаршчыкаў».

Валерый Берастаў падкрэсліў, што жыхары сельскай мясцовасці забяспечылі стабільна высокую яўку, працэнт якой паміж раёнамі адрозніваўся нязначна. Тым не менш, у вобласці можна адзначыць чатыры раёны – Краснапольскі, Мсціслаўскі, Хоцімскі і Чэрыкаўскі, у якіх лідзіруючая колькасць галасоў аддадзена за дзеючага кіраўніка дзяржавы.

«На выбарчых участках былі створаны ўсе неабходныя ўмовы для таго, каб выбары прайшлі ў спакойнай і добразычлівай абстаноўцы, – працягнуў Валерый Берастаў. – У сваёй працы камісіі ўсіх узроўняў у першую чаргу кіраваліся выбарчым кодэксам Рэспублікі Беларусь, а таксама іншымі дакументамі, рэкамендаванымі Цэнтрвыбаркамам».

Асобная ўвага на выбарчых участках была нададзена эпідэміялагічнай бяспецы грамадзян, бо здароўе людзей заўсёды стаіць на першым месцы. Так, на кожным участку выбаршчыкі маглі прадэзынфікаваць рукі, а члены ўчастковых камісій былі аснашчаны ахоўнымі шчыткамі і маскамі.

Закранаючы звароты грамадзян, Валерый Берастаў удакладніў, што ў выбарчыя камісіі паступала шмат званкоў: «У перыяд летніх адпачынкаў выбаршчыкі пыталіся, ці можна аддаць голас за свайго кандыдата не па месцы рэгістрацыі, а таксама прасілі аказаць садзейнічанне ў галасаванні не на сваім выбарчым участку. Ім тлумачылі, што парадак галасавання дакладна вызначаны заканадаўствам. У выпадках, калі гэта магчыма, і не супярэчыла закону, такая магчымасць прадастаўлялася».

Асобная ўвага нададзена зваротам назіральнікаў, з якіх не ўсе змаглі прысутнічаць на выбарчых участках. Ім было растлумачана, што ва ўмовах эпідэміялагічнай сітуацыі ў перыяд датэрміновага галасавання на ўчастку могуць прысутнічаць адначасова не больш за тры назіральнікі, а ў дзень асноўнага галасавання – не больш за пяць чалавек. Прычым гэтыя людзі вызначаліся па тэрмінах акрэдытацыі.

У асноўны дзень галасавання ў Магілёўскай вобласці працаваў 731 выбарчы ўчастак, у тым ліку 34 – у арганізацыях аховы здароўя і санаторыях, якія аказваюць медыцынскую дапамогу на стацыянарнай аснове. У рэгіёне было зарэгістравана больш за 6 тыс. назіральнікаў.

БЕЛТА