Жыліцкі палацава-паркавы ансамбль плануюць увесці ў эксплуатацыю да 30 чэрвеня

Жыліцкі палацава-паркавы ансамбль плануюць увесці ў эксплуатацыю да 30 чэрвеня. Пра гэта паведаміў міністр культуры Анатоль Маркевіч на калегіі Міністэрства культуры «Аб выніках дзейнасці сферы культуры ў 2022 годзе і задачах развіцця на 2023-й», якая прайшла ў Беларускім дзяржаўным музеі гісторыі Вялікай Айчыннай вайны.

«У галіне капітальнага будаўніцтва і матэрыяльна-тэхнічнага забеспячэння галіны культуры неабходна ў тэрмін да 30 чэрвеня ўвесці ў эксплуатацыю помнік архітэктуры XVIII-XIX стагоддзяў – Палацава-паркавы ансамбль у вёсцы Жылічы Кіраўскага раёна Магілёўскай вобласці. Таксама сумесна з Міністэрствам эканомікі і Міністэрствам фінансаў будзе прапрацавана пытанне выдзялення дадатковых сродкаў на працяг будаўнічых работ у Менскім дзяржаўным мастацкім каледжы імя А.К.Глебава», - праінфармаваў Анатоль Маркевіч.

Акрамя таго, дзяржаўнай інвестыцыйнай праграмай на 2023 год на працяг будаўніцтва пяці аб'ектаў (Нацыянальнага мастацкага музея, Спаса-Праабражэнскай царквы ў Полацку, касцёла Божага Цела ў Нясвіжы, Палацавага комплексу ў Ружанах Пружанскага раёна, мастацкага каледжа імя А.К.Глебава) выдзелены сродкі рэспубліканскага бюджэту ў аб'ёме Br11,23 млн.

БЕЛТА