Содержимое

Круглы стол на тэму «Фальклор як захавальнік духоўнай культуры» адбыўся 12 кастрычніка ў Магілёўскім абласным метадычным цэнтры народнай творчасці і культурна-асветнай працы. Удзельнікамі палілога сталі навукоўцы, спецыялісты ўстаноў культуры, якія займаюцца вывучэннем і актуалізацыяй фальклору і традыцыйнай культуры рэгіёнаў Беларусі і Расіі. Яны разгледзелі актуальныя пытанні захавання і папулярызацыі фальклорнай спадчыны, вопыт яе ўключэння ў сучасную забаўляльную прастору.

Падчас акцыі «Зробім утульнай малую радзіму» ў прамысловай зоне Магілёва высадзілі 2,3 тыс хуткарослых саджанцаў. Новыя дрэвы з’явіліся ў свабоднай эканамічнай зоне ў раёне вузла № 4, дзе яны стануць абаронай ад негатыўнага ўздзеяння прадпрыемстваў. У пасадцы ўдзельнічалі ўсе зацікаўленыя: прадстаўнікі абласнога камітэта прыродных рэсурсаў і аховы навакольнага асяроддзя, лясгаса, аблгідрамета, санітарна-гігіенічнай службы, аблвыканкама, БРСМ, адміністрацыя і рэзідэнты СЭЗ, навучэнцы і студэнты, неабыякавыя жыхары горада на Дняпры і экаактывісты.

Конкурс прафесійнага майстэрства сярод кіроўцаў смеццявозаў прайшоў у Магілёве на аўтадроме абласнога «ДТСААФ» 11 кастрычніка. Ён сабраў работнікаў прадпрыемстваў жыллёва-камунальнай гаспадаркі з усяго рэгіёна. На шляху да перамогі канкурсантам трэба было прадэманстраваць веды правілаў дарожнага руху, прылад і тэхнічнага абслугоўвання аўтамабіляў, а таксама навыкі кіравання аўтамабілем-смеццявозам. Пераможцам стаў 27-гадовы работнік Крычаўскага УКПП «Камунальнік» Аляксандр Аўраменка.