ААТ «Магілёўхімвалакно» пастаўляе на экспарт 60% прадукцыі

ААТ «Магілёўхімвалакно» адпраўляе на экспарт 60% прадукцыі, а геаграфія паставак уключае 29 краін свету. Пра гэта паведаміў генеральны дырэктар прадпрыемства Пётр Руднік.

Прафесійнае свята – гэта не толькі дань павагі працаўнікам хімічнай галіны, але і знакавая дата для Магілёва і Прыдняпроўскага краю, падкрэсліў кіраўнік. Бо менавіта «вялікая хімія» дала магутны штуршок развіццю абласнога цэнтра. І сёння «Магілёўхімвалакно» з’яўляецца горадаўтваральным прадпрыемствам, дзе працуе больш за 5 тыс. жыхароў горада. А па ўдзельнай вазе ў прамысловай вытворчасці Магілёўскай вобласці за 4 месяцы 2021 года камбінат дзеліць 2 і 3 месцы з ААТ «Белшына». 7,5% прадукцыі рэгіёна вырабляецца ардэнаносным «Магілёўхімвалакно».

Пётр Руднік паведаміў, што па выніках працы за студзень-красавік прадпрыемствам выкананы ўсе ключавыя паказчыкі эфектыўнасці працы і ўсе асноўныя прагнозныя паказчыкі, даведзеныя канцэрнам «Белнафтахім» на I паўгоддзе бягучага года. Забяспечана бясстратная праца. Прыбытак ад рэалізацыі прадукцыі – больш за Br14 млн., выручка – Br281 млн., а валютная выручка перавысіла $65 млн. Тэмп росту экспарту тавараў да аналагічнага перыяду мінулага года – 125%. Як вынік – сярэднямесячная заработная плата за красавік па камбінаце склала Br1415.

«За гэтымі сухімі лічбамі стаіць паўсядзённая і карпатлівая праца ўсіх без выключэння супрацоўнікаў «Магілёўхімвалакно», – канстатаваў Пётр Руднік. – Нашы кадры – гэта золатавалютны рэзерв прадпрыемства».

Асаблівыя словы падзякі генеральны дырэктар выказаў заслужаным ветэранам, шматгадовай працай якіх кавалася працоўная слава «Лаўсана», а таксама ўсім, хто стаяў ля вытокаў развіцця хімічнай галіны ў Магілёве, заклаў трывалы падмурак слаўных традыцый «Магілёўхімвалакно».

Урачыстае мерапрыемства, прысвечанае Дню хіміка, адбылося сёння ў Палацы культуры вобласці. Ганаровымі гасцямі свята сталі старшыня Магілёўскага аблвыканкама Леанід Заяц, старшыня Магілёўскага гарадскога Савета дэпутатаў Максім Гурын, кіраўнік адміністрацыі Кастрычніцкага раёна Магілёва Пётр Салаўёў, а таксама прадстаўнікі канцэрна «Белнафтахім», прадпрыемстваў і арганізацый, работнікі хімічнай галіны рэгіёна.