Выкананне Дырэктывы №1 у Магілёўскай вобласці абмеркавалі на пасяджэнні аблвыканкама

Пасяджэнне Магілёўскага аблвыканкама аб ходзе выканання патрабаванняў Дырэктывы Прэзідэнта Рэспублікі Беларусь ад 11 сакавіка 2004 г. №1 «Аб мерах па ўмацаванню грамадскай бяспекі і дысцыпліны» правёў сёння старшыня аблвыканкама Анатоль Ісачанка. Удзел у ім прынялі намеснік генеральнага пракурора Рэспублікі Беларусь Сяргей Хмарук, старшыня абласнога Савета дэпутатаў Аляксандр Гарошкін, а таксама намеснікі старшыні аблвыканкама, члены выканкама, старшыні гаррайвыканкамаў і іх намеснікі, кіраўнікі адміністрацый раёнаў у Магілёве і Бабруйску, старшыні гарадскіх і раённых кіраўнікоў структурных падраздзяленняў аблвыканкама і гарвыканкамаў, прадстаўнікі структур рэспубліканскіх органаў кіравання прадпрыемстваў і арганізацый, кіраўнікі прадпрыемстваў і арганізацый рэгіёну, у рэжыме відэаканферэнцсувязі - дэпутаты Палаты прадстаўнікоў Нацыянальнага сходу Рэспублікі Беларусь.

Як далажыў у сваёй справаздачы намеснік старшыні аблвыканкама Алег Сцельмашок, па выніках работы за 9 месяцаў 2025 года ў Магілёўскай вобласці па шэрагу напрамкаў ёсць станоўчыя тэндэнцыі: назіраецца зніжэнне колькасці выпадкаў вытворчага траўматызму, злачынстваў, якія ўчыняюцца ў грамадскіх месцах, наўмысных прычыненняў цяжкіх цялесных пашкоджанняў. дарожна-транспартных здарэнняў з пацярпелымі. Разам з тым з пачатку года павялічылася колькасць пажараў і загінуўшых на іх людзей, грамадзян, якія памерлі ад атручэння алкаголем. Праведзенае абмеркаванне з разборам канкрэтных сітуацый і заслухоўванне адказных службаў дазволілі выпрацаваць пералік першачарговых мер па ўстараненню выяўленых недахопаў і безумоўнаму выкананню на тэрыторыі вобласці патрабаванняў дырэктывы.

Так, Сяргей Хмарук падкрэсліў, што пытанне выканання Дырэктывы №1 актуальнае для ўсіх рэгіёнаў з улікам іх асаблівасцей. У прыватнасці, ён адзначыў неабходнасць звярнуць больш пільную ўвагу на працу з уразлівымі катэгорыямі: «У асаблівым характары абароны маюць патрэбу пажылыя грамадзяне: ад замахаў на асобу, на маёмасць і іншых. Гэта ўразлівая катэгорыя, якой павінны займацца мясцовыя органы ўлады, - падзяліўся ён меркаваннем, адказваючы на пытанні журналістаў. - Вядома, не абышлі сёння бокам пытанні захавання правілаў пажарнай бяспекі, асабліва ў месцах масавага або кругласутачнага знаходжання грамадзян. Таксама ўдзялілі ўвагу пытанням дарожнай дысцыпліны. Першым чынам, для належнай арганізацыі дарожнага руху павінны быць прыняты меры інжынернага характару.

У цэлым жа можна адзначыць, што на тэрыторыі Магілёўскай вобласці знізілася злачыннасць. І гэта вынік сумеснай працы праваахоўных і мясцовых органаў улады, грамадскасці, дружыннікаў».

Начальнік Магілёўскага абласнога ўпраўлення МНС Дзмітрый Голубеў пазначыў, што тэма сённяшняга паседжання – важная і шматгранная: «Дырэктыва №1 тычыцца ўмоваў пражывання грамадзянаў не толькі ў сваіх домаўладаннях, але і ў інтэрнатах, гэта тычыцца аб'ектаў з масавым кругласутачным прыбываннем людзей. І сёння пытанне актуальнае, таму што многія аб'екты знаходзяцца на кантролі і выкананні мерапрыемстваў, якія прапісаны ў плане дырэктывы ў 2025 годзе».

Ён расказаў, што сённяшняя задача - не толькі далажыць аб тым, што ўжо зроблена, але і разабраць прычыны невыканання асобных пытанняў. Так, ён абазначыў, што ў рэгіёне за 9 месяцаў адзначаны рост пажараў на 17,6% да ўзроўню мінулага года. Пры гэтым рост загінуўшых склаў 24% (56 чалавек, у мінулым годзе - 45). У 79% - гэта жылы фонд: «Сярод прычын пажараў па-ранейшаму лідзіруюць неасцярожнае абыходжанне грамадзян з агнём, парушэнне правілаў эксплуатацыі электраабсталявання, парушэнне эксплуатацыі цеплагенерыруючых прылад. Таксама адзначаецца рост пажараў транспартных сродкаў (на 10 выпадкаў): Часцяком, гэта выпадкі пажару з-за кароткага замыкання электраправодкі ці акумулятарных батарэй у старых і часам ужо тэхнічна непрыдатных да эксплуатацыі аўта.

Дарэчы, з 56 загінуўшых на пажарах: 34 - пенсіянеры, 8 чалавек - працуючыя, 14 - гэта людзі працаздольныя, але не працавалі па нейкіх прычынах. Усе, хто загінуў з апошняй катэгорыі на момант здарэння, знаходзіліся ў стане алкагольнага ап'янення.

Мы ўвесь час на ўсіх мерапрыемствах, у тым ліку і на сельскіх сходах з насельніцтвам, абмяркоўваем меры, як не дапусціць рост. Самае важнае - звярнуць іх увагу на ўласную бяспеку, каб у іх саміх з'явілася запатрабаванне да бяспечнага пражывання. На жаль, не ўсе рэагуюць, а потым папаўняюць спіс загінуўшых. Але гэта работа арганізавана на планавай аснове ўсімі суб'ектамі прафілактыкі. Мы ў бягучым годзе правялі спецыяльныя прафілактычныя мерапрыемствы «Дом без пажару» - 37 мерапрыемстваў на тэрыторыі вобласці, куды ўцягнуты былі ўсе суб'екты прафілактыкі: УУС, ССА, Саветы дэпутатаў, «Энергагазнагляд». Усе разам мы займаемся гэтай прафілактычнай працай, каб дасягнуць жаданага выніку», - рэзюмаваў Дзмітрый Голубеў.

У сваю чаргу начальнік абласнога ўпраўлення дэпартамента дзяржаўнай інспекцыі працы Сяргей Жыгуноў расказаў, што ў частцы прафілактыкі вытворчага траўматызму, план у выкананні Дырэктывы №1 у Магілёўскай вобласці можна лічыць практычна выкананым: «Самае галоўнае, лічбы сведчаць аб тым, што ідзе, можа быць, не такое значнае, як хацелася б, але ўсё ж зніжэнне колькасці выпадкаў.

Па 9 месяцах колькасць выпадкаў гібелі засталася на ўзроўні мінулага года. Працаваць, безумоўна, яшчэ ёсць над чым. Трэба, у першую чаргу, умацоўваць выканальніцкую, вытворчую, тэхналагічную дысцыпліну, максімальна матываваць работнікаў выконваць патрабаванні па ахове працы. І тады мы дасягнем яшчэ большага выніку. Дынаміка траўматызму паказвае мінус шэсць выпадкаў за 9 месяцаў да ўзроўню мінулага года - 186 выпадкаў (192 - за аналагічны перыяд мінулага года). Часцей за ўсё - гэта сферы сельскай і лясной гаспадарак, будаўніцтва, ЖКГ. Большасць выпадкаў - лёгкія, якія не выклікалі значную страту працаздольнасці. Лічба высокая, але трэба казаць, што з году ў год яна змяншаецца».

Юлія Таранава, фота Галіны Гаўрыловіч