ААТ «Стужка» прадставіць прадукцыю на выставе тэкстылю ў Франкфурце

ААТ «Стужка» прыме ўдзел у выставе Heimtextil 2020, якая пройдзе 7–10 студзеня ў Франкфурце-на-Майне, паведамілі ў канцэрне «Беллегпрам».

У прыватнасці, наша прадпрыемства пазнаёміць наведвальнікаў з шырокім асартыментам уласнай прадукцыі. ААТ «Стужка» з’яўляецца адным з найбуйнейшых вытворцаў тэкстыльнай галантарэі ў рэспубліцы, выпускае стужкі розных відаў, гардзінныя палотны, абрусы, сурвэткі, пакрывалы, ручнікі, камплекты штор.

Выставу таксама плануюць наведаць прадстаўнікі ААТ «Магатэкс».

Heimtextil Frankfurt – найбуйнейшая міжнародная выстава тэкстылю і тканін для дома. Праводзіцца з 1971 года і знаёміць з новымі тэндэнцыямі і інавацыямі ў тэкстыльнай прамысловасці. Дзякуючы вялікай колькасці экспанентаў і наведвальнікаў з усіх пяці кантынентаў выстава стала важнай падзеяй для вытворцаў і дыстрыб’ютараў. Heimtextil прапануе шырокі асартымент хатняга тэкстылю для ванных пакояў, пасцельнага і настольнага тэкстылю, прадукцыі для вокнаў, абіўкі, падлог, сцен, абароны ад сонца.

У 2019 годзе на Heimtextil свае інавацыі прадставілі звыш 3 тыс. прадпрыемстваў, мерапрыемства наведала больш 67,2 тыс. чалавек.