Аб любові да малой радзімы, працавітасці і мэтанакіраванасці: у Магілёве адбыўся адкрыты дыялог з удзельнікамі цягніка «#Беларусь. Моладзь. Натхненне»

Пазітывам, энергіяй мэтанакіраванасці і веры ў свае сілы, душэўнай цеплынёй да малой радзімы быў напоўнены адкрыты дыялог з удзельнікамі рэспубліканскага цягніка «#Беларусь. Моладзь. Натхненне». Гутарка праходзіла сёння ў сценах Магілёўскага дзяржаўнага ўніверсітэта імя А. А. Куляшова. Дарэчы, большасць ганаровых гасцей палілогу, якія расказалі моладзі асабістыя гісторыі поспеху і аб працоўных буднях, у свой час скончылі менавіта гэту ВНУ. Магчыма, таму падчас зносін часта гучалі цёплыя ноткі настальгіі аб студэнцкіх гадах.

Сустрэча з таленавітай моладдзю краіны, на якой прысутнічалі прадстаўнікі выканаўчай улады, абласных грамадскіх арганізацый (БРСМ, БРПА, Савет ветэранаў, Саюз пісьменнікаў Беларусі, Беларускі саюз жанчын «Спадчына»), нездарма праводзілася ў сценах МДУ імя А. А. Куляшова. Усім вядома, што менавіта тут вучыўся кіраўнік нашай дзяржавы. Гэтаму перыяду ў зале Славы навучальнай установы адводзіцца цэнтральнае месца. Каманда рэспубліканскага цягніка, вядома, пабывала тут напярэдадні адкрытага дыялогу.

«Думаю, дакрануўшыся да характарыстык, заліковых кніжак нашага Прэзідэнта, вы атрымалі пэўны імпульс, стымул да развіцця і ўрок жыцця, які паказвае, што ўсяго трэба дамагацца сваёй працай, нярэдка пераадольваючы на шляху перашкоды», – падкрэсліў намеснік старшыні Магілёўскага аблвыканкама Валерый Малашка. 

Ён адзначыў, што моладзь заўсёды займала актыўную пазіцыю. І сёння важна, каб гэта пазіцыя была канструктыўнай. «Вас выхавалі на традыцыях, якія жывуць у вашых сем’ях, нашай краіне. Тое, што ў складзе цягніка так многа таленавітай моладзі, сведчыць аб правільнасці такіх падыходаў. Давайце паглядзім вакол, разумна ацэнім сітуацыю і будзем, раўняючыся на подзвігі старэйшых пакаленняў, выбудоўваць будучыню сучаснай Беларусі, рухацца наперад», – сказаў Валерый Малашка.

Паводле слоў намесніка старшыні, сёння асаблівую значнасць набывае правільнае разуменне важнасці ўсяго, што маем. «З часоў распаду Савецкага Саюзу Беларусі ўдалося захаваць мір, адкрытыя межы, геаграфію краіны, прамысловы патэнцыял, перафарматаваць працу сельскай гаспадаркі. Мы выдатна разумеем патрэбы моладзі ў працаўладкаванні, добрай заработнай плаце, якія ў сукупнасці ўплываюць на стварэнне сям’і, якасны побыт, нараджэнне дзяцей. Менавіта таму, ужо маючы пэўную заканадаўчую базу, цяпер шукаем новыя формы матывавання і замацавання маладых супрацоўнікаў на працоўным месцы», – канстатаваў ён.

Менавіта такім убачыла каманда цягніка маладога выкладчыка беларускай мовы і літаратуры Мяжысецкай сярэдняй школы Антона Лабаноўскага. Ён раскрыў хлопцам і дзяўчатам свой сакрэт педагагічнай філасофіі. «Кожны вечар пішу планы-канспекты, новыя заданні. І гэту працу параўноўваю з падрыхтоўкай пірага для сваіх вучняў, – расказаў настаўнік. – Мікс, дадаю розныя інгрэдыенты. Прыношу яго раніцай у школу і раздаю хлопцам. Хтосьці возьме і з’есць з апетытам, хтосьці адкусіць, а некаторыя адмовяцца, апраўдаўшы тым, што не любяць салодкага. У выніку застаецца падноска. Гледзячы на кавалачкі, што засталіся, ацэньваю вынік сваёй працы: што зрабіў не так, што выйшла выдатна. Падрыхтоўка гэтага «пірага» для мяне – натхненне, а вынік – паказчык таго, наколькі педагог – маё прызванне».

На думку Антона Лабаноўскага, правільна выбраць сваё прызначэнне ў жыцці – сапраўднае шчасце. Таму выкладчык пажадаў удзельнікам рэспубліканскага цягніка зрабіць усё, каб знайсці свой правільны шлях.

А годны прыклад зусім побач. Дэпутат Палаты прадстаўнікоў Нацыянальнага сходу Сяргей Сыранкоў, які цяпер выступае кіраўніком цягніка «#Беларусь. Моладзь. Натхненне», родам з глыбінкі. Калісьці прыехаў паступаць у МДУ імя А. А. Куляшова, паспяхова скончыў ВНУ, працаваў у Краснаполлі, паступова рухаўся па кар’ернай лесвіцы. І формула яго поспеху трымаецца на трох складніках: самакрытычнасць і патрабавальнасць ў адносінах да сябе, працавітасць і ўменне «бачыць перад сабой чалавека».

На асабістую адказнасць кожнага за ўсё, што адбываецца ў жыцці і краіне, звяртаў увагу і член Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці, прарэктар па вучэбнай рабоце МДУ імя А. А. Куляшова Алег Дзячэнка.

Дзякуючы падтрымцы дзяржавы сёння дзясяткі тысяч беларускіх юнакоў і дзяўчат па ўсёй краіне ўключаны ў актыўную грамадскую дзейнасць. Многія занятыя вырашэннем сацыяльных праблем моладзі, іншыя рэалізуюць творчы, навуковы, спартыўны патэнцыял, бескарысліва дапамагаюць іншым, адзначыў сенатар. «Наша моладзь нарадзілася ў часы новай эпохі беларускай дзяржаўнасці і расла са сваёй краінай. Маладая і спакойная Беларусь стала для многіх надзейным тылам, захаваўшы духоўныя каштоўнасці і нацыянальную культуру. Нам разам ісці наперад, да новых вяршынь і перамог», – падкрэсліў Алег Дзячэнка.

Падчас адкрытага дыялогу моладзь задавала пытанні ганаровым гасцям, чытала вершы ўласнага сачынення, прысвечаныя Сінявокай. У падарунак на памяць дэлегацыям абласцей падарылі кнігі, якія расказваюць аб Прыдняпроўскім краі. Таксама магілёўцы перадалі ў Беларускі дзяржаўны музей гісторыі Вялікай Айчыннай вайны скульптурную кампазіцыю «Змагарам за свабоду і незалежнасць Беларусі прысвячаецца», зробленую навучэнцамі Магілёўскага політэхнічнага каледжа – удзельнікамі Ганаровага паста памяці ля Вечнага агню на плошчы Славы.

Рэспубліканскі маладзёжны цягнік «#Беларусь. Моладзь. Натхненне» стартаваў 18 ліпеня з Віцебска. Праект Міністэрства адукацыі, Беларускага рэспубліканскага саюза моладзі і Беларускай чыгункі аб’яднаў больш за 80 хлопцаў і дзяўчат ад 18 да 31 года з розных рэгіёнаў – таленавітых навучэнцаў, студэнтаў, маладых навукоўцаў, спартсменаў, працоўную і сельскую моладзь, удзельнікаў студатрадаўскага руху, валанцёраў, блогераў.

Праграма новага моладзевага праекта вельмі насычаная. Стартавала яна на Дні моладзі падчас «Славянскага базару ў Віцебску»: дэлегацыя прыняла ўдзел ва ўрачыстай цырымоніі адкрыцця фестывалю #YouthDays2020, адкрытым дыялогу «Беларусь: учора, сёння, заўтра», рэспубліканскім турніры па гіравым спорце, фестывалі кавераў, начным парадзе. А ў 23.00 чыгуначны састаў, аформлены сімволікай праекта, адправіўся ў шлях.

За тыдзень каманда наведае ўсе абласныя гарады і некалькі раённых цэнтраў па маршруце Віцебск – Шклоў – Магілёў – Гомель – Пінск – Брэст – Гродна – Маладзечна – Мінск. У кожным з іх запланаваны сустрэчы з кіраўніцтвам аблвыканкамаў і райвыканкамаў, адкрытыя дыялогі з кіраўнікамі арганізацый, дэпутатамі, лідарамі грамадскіх арганізацый, наведванне мемарыяльных комплексаў і знакавых аб’ектаў. У гонар 75-годдзя Вялікай Перамогі ўдзельнікі праекта аддадуць даніну памяці героям у мемарыяльных комплексах і ўскладуць кветкі да манументаў. Таксама хлопцы і дзяўчаты паўдзельнічаюць у дабрачынных і працоўных акцыях, лідарскіх трэнінгах, майстар-класах, музычна-патрыятычных канцэртах і спартыўных спаборніцтвах.