Абноўленую паліклініку адкрыюць у Асіповічах да «Дажынак»

Да маючых адбыцца абласных «Дажынак» у Асіповічах пасля капітальнага рамонту адкрыюць абноўленую паліклініку. Пра гэта паведаміў намеснік старшыні Асіповіцкага райвыканкама Аляксандр Ганчароў.

«Да будучых «Дажынак» у нашым горадзе адкрыецца абноўленая паліклініка. Зараз тут ужо заканчваюцца знешнія аддзелачныя работы, наперадзе – добраўпарадкаванне тэрыторыі, – адзначыў Аляксандр Ганчароў – для людзей з абмежаванымі фізічнымі магчымасцямі абсталяваны пандус, унутры паліклінікі будзе ўстаноўлены спецыяльны пад’ёмнік, для людзей з аслабленым зрокам на тэрыторыі паліклінікі ўсталююць спецыяльную тактыльную плітку, якая дапаможа арыентавацца».

Паводле слоў намесніка старшыні, гатоўнасць аб’екта на сённяшні дзень складае 50%. Штодня тут працуе амаль 200 чалавек. «Ужо заканчваецца кладка інжынерных сетак, прыведзены ў парадак сцены, выраўнялі падлогі, у некаторых кабінетах і памяшканнях ўжо прыступілі да кладкі пліткі. У найбліжэйшы час скончым і ўнутранае аздабленне памяшканняў», – расказаў Аляксандр Ганчароў.

Адкрыццё паліклінікі для жыхароў горада – важная падзея. Будынак, дзе размяшчаецца ўстанова аховы здароўя, 1984 года. І з таго часу тут не праводзілася капітальных рамонтаў. «Латалі дах, падтрымлівалі знешні выгляд і ўнутраны стан будынка. Аднак за столькі гадоў ён маральна састарэў. Таму рамонту чакалі ўсе. Цяпер ад старой пабудовы тут засталіся толькі сцены, ды і то не ўсюды, – адзначыў Аляксандр Ганчароў. – Многія кабінеты і тэхнічныя памяшканні былі перапрафіляваны, каб адпавядаць сучасным медыцынскім і будаўнічым патрабаванням».

Кошт капітальнага рамонту склаў Br6 млн.

Абласныя «Дажынкі» плануецца правесці ў Асіповічах 13 лістапада.

БЕЛТА