Абноўлены басейн адкрылі ў Горацкім раёне

Урачыстае адкрыццё абноўленага школьнага басейна прайшло сёння ў аграгарадку Аўсянка Горацкага раёна.

Ва ўрачыстай цырымоніі прыняў удзел старшыня Магілёўскага аблвыканкама Леанід Заяц, памочнік Прэзідэнта – інспектар Магілёўскай вобласці Леанід Мартынюк, прадстаўнікі Горацкага райвыканкама і Аўсянкаўскага сельсавета, будаўнічай арганізацыі ПУВП «Праметэй», адміністрацыі Аўсянкаўскай сярэдняй школы, жыхары аграгарадка.

«У Беларусі вялікая ўвага надаецца развіццю сацыяльнай сферы, спорту і здароўю жыхароў. Традыцыйна да 7 лістапада ў нашай краіне адкрываецца шэраг сацыяльна значных аб’ектаў. І сёння ў Горацкім раёне пасля рамонту з’явіўся яшчэ адзін важны аб’ект – басейн. Мы змаглі ўвасобіць жаданне жыхароў не толькі аграгарадка Аўсянка, але і найбліжэйшых населеных пунктаў. Цяпер у дзяцей і дарослых з’явіцца магчымасць займацца плаваннем, падтрымліваць сваё здароўе», – адзначыў падчас урачыстага адкрыцця басейна старшыня Магілёўскага аблвыканкама Леанід Заяц.

Басейн належыць Аўсянкаўскай сярэдняй школе. Зараз тут навучаецца 106 дзяцей з Аўсянкі, арганізаваны падвоз школьнікаў з шасці населеных пунктаў. Па тэхнічных прычынах басейн не працаваў з 1990 па 2009 год. «У 2009 годзе тут правялі частковы рамонт, зноў запрацаваў басейн. Аднак з лістапада 2018 года будынак не эксплуатаваўся, – расказала дырэктар Аўсянкаўскай сярэдняй школы Валянціна Крэміс. – Сёння для нас радасны дзень. Басейн у нашай школе быў вельмі запатрабаваны, сюды прыязджалі дзеці з усяго Горацкага раёна, наведвалі яго і дзеці з суседняга Шклоўскага раёна. І мы спадзяёмся, што абноўлены басейн будзе запатрабаваным месцам як у навучэнцаў, так і іх бацькоў».

Рамонтныя работы ў будынку басейна пачаліся ў ліпені гэтага года. Капітальны рамонт плавальнага басейна быў зроблены прыватным унітарным вытворчым прадпрыемствам «Праметэй». «Тут правялі вялікі рамонт: замянілі пакрыццё чашы басейна, узмацнілі падмурак будынка, замянілі водаправодныя і каналізацыйныя сеткі ўнутры басейна, адрамантавалі душавыя і распранальні, – расказаў генеральны дырэктар прадпрыемства Анатоль Федаровіч. – Аб’ект быў няпросты, але з пастаўленымі задачамі мы справіліся. Дзецям падабаецца – гэта галоўнае».

Абноўлены басейн у Аўсянцы – стандартны, 25 метраў. Ён падзелены на тры дарожкі. У вучэбны час тут будуць праходзіць заняткі ў школьнікаў, а ў вячэрні басейн змогуць наведаць усе жадаючыя. Кошт разавага наведвання – ўсяго Br3,5. Як расказала адна з маленькіх наведвальніц басейна Дар’я Ярома з вёскі Поўна, цяпер сюды яны будуць прыязджаць усёй сям’ёй. «Раней тут быў балкон, басейн выглядаў зусім па-іншаму, – расказала дзяўчынка. – Цяпер тут усё новае, зручнымі і прыгожымі сталі распранальні. Абавязкова будзем прыязджаць сюды з бацькамі».

«Басейн на ўсіх зрабіў добрае ўражанне. Я сам родам з вёскі і разумею, які гэта вялікі і важны падарунак для жыхароў аграгарадка, – адзначыў Леанід Заяц. – Развітая сацыяльная палітыка ў нашай краіне – шлях, які абраў кіраўнік дзяржавы. Ён накіраваны на развіццё і падтрыманне людзей. А сур’ёзныя фінансавыя ўкладанні ў такія важныя аб’екты яшчэ раз даказваюць, што здароўе нацыі залежыць ад кожнага жыхара краіны».

Капітальны рамонт басейна – гэта першы этап рамонтных работ у Аўсянкаўскай сярэдняй школе. Наступны этап – капітальны рамонт самога будынка школы – абяцаюць пачаць у найбліжэйшы час.

Фота Алега Файніцкага,  БЕЛТА