Адкрыўся продаж білетаў на спектаклі Міжнароднага маладзёжнага тэатральнага форуму «М.@rt.Контакт»

Адкрыўся продаж білетаў на спектаклі Міжнароднага маладзёжнага тэатральнага форуму «М.@rt.Контакт», які пройдзе ў Магілёве з 20 па 27 сакавіка. Пра гэта расказалі ў абласным драматычным тэатры.

Яркая культурная падзея адбудзецца ў абласным цэнтры 18-ы раз і традыцыйна збярэ самых адданых гледачоў. У праграме форуму запланаваны паказы спектакляў беларускіх і замежных тэатральных калектываў, майстар-класы, творчыя сустрэчы, майстэрні маладой рэжысуры. З кожным годам форум павышае планку, таму старанная інтэлектуальная і творчая работа чакае не толькі аматараў тэатра, але і тэатральных крытыкаў, якім трэба выбраць лепшыя спектаклі.

У першы дзень форуму на магілёўскай сцэне можна будзе ўбачыць монаспектакль расійскай актрысы Алены Барзовай "Адкрыцці Бернандайн", а таксама пастаноўку «Перад кінасеансам/Мая Марусечка». Гэтая праца Маскоўскага тэатра КАЛЯ дома Станіслаўскага ўяўляе сабой своеасаблівую машыну часу і пераносіць гледача ў савецкую эпоху, нараджаючы настальгію па далёкіх часах.

Шырока на форуме будуць прадстаўлены беларускія тэатры: у Магілёў прыедуць калектывы з Брэста, Бабруйска, Гомеля, Мінска. Тэатральную публіку будуць радаваць сваімі пастаноўкамі і расійскія трупы: на «М.@rt.Контакт» чакаюць творчых гасцей з Масквы, Санкт-Пецярбурга, Орска, Волагды, Разані, Бранска, Арла і іншых гарадоў.

Фестываль існуе з 2006 года, і за гэты час ён стаў адной з самых значных, любімых і чаканых культурных падзей на ўсёй тэатральнай прасторы краіны. Яго геаграфія шырокая і маштабная: за гады правядзення паказана звыш 300 спектакляў з больш як 20 краін свету. Гэтыя пастаноўкі паглядзелі некалькі дзясяткаў тысяч гледачоў. Білеты на форум можна набыць онлайн і ў касе тэатра.

БЕЛТА