Адным з аб’ектаў абласнога суботніка стаў Магілёўскі ФАК на вул. Фаціна і прылеглая да яго тэрыторыя. Відэа

Абласны суботнік праходзіць сёння на Магілёўшчыне. Галоўная мэта мерапрыемства – навесці парадак на тэрыторыі рэгіёна перад зімой.

Адным з асноўных аб’ектаў, дзе праводзіліся работы, стаў Магілёўскі шматфункцыянальны спартыўны комплекс на вуліцы Фаціна і прылеглая да яго тэрыторыя. Тут працавала каля 140 чалавек – кіруючы склад, прадстаўнікі структурных падраздзяленняў аблвыканкама, абласнога Савета дэпутатаў. Яны высаджвалі лісцяныя і іглічныя дрэвы і хмызнякі, прыбіралі смецце і наводзілі санітарны парадак.

На вул. Вялікая Чавуская ў раёне скрыжавання з вул. Златавустаўскага пасялілася 200 дрэў і 450 кустоў – ліпы, хвоі, бярозы, вярбы, клёны і таполі. Жывую агароджу аформілі з пузыраплодніка каліналіснага.

Як адзначыў старшыня Магілёўскага аблвыканкама Леанід Заяц, месца для работ было абрана не выпадкова, бо сёлета плануюць завяршыць апошні этап будаўніцтва ФАКа. «Настрой ва ўсіх выдатны, дзень для працы добры. Радуе і тое, што мы завяршаем важны для горада аб’ект – шматфункцыянальны спарткомплекс, які патрэбны як для жыхароў гэтага раёна, так і для ўсёй вобласці. Бо тут мы будзем гадаваць новых зорак сусветнага спорту па плаванні, барацьбе і іншых відах. Комплекс узводзіцца пры падтрымцы Прэзідэнта нашай краіны. Завяршыць работы тут мы плануем ужо сёлета. Гэта здыме вялікі спектр праблем, якія ёсць у гэтым раёне. Ва ўсіх будзе магчымасць знайсці сабе спартыўную секцыю па гусце – як дзецям і моладзі, так і людзям больш старэйшага ўзросту. Мы хочам, каб людзі беражліва ставіліся да таго, што ствараецца для іх, і з радасцю наведвалі новы аб’ект. Бо здаровы лад жыцця – гэта здароўе ўсёй нацыі», – падкрэсліў Леанід Заяц.

Па словах кіраўніка рэгіёна, да суботніка далучылася вялікая колькасць людзей. Яны прыводзяць у парадак тэрыторыі гарадоў і раёнаў, вытворчыя аб’екты, двары. Гэта трэба для таго, каб годна сустрэць зіму.

«Мы праводзім працу з насельніцтвам, каб яно максімальна прымала ўдзел у добраўпарадкаванні, рамонце і ўладкаванні дзіцячых гульнявых пляцовак, – расказала старшыня абласнога Савета дэпутатаў Ірына Раінчык. – Людзі далучаюцца, а потым больш беражліва ставяцца да ўсяго. Нашы суботнікі паказваюць, што з кожным годам удзельнікаў становіцца ўсё больш. Важна, што да нас далучаюцца дзеці. Бо любоў да свайго горада, вобласці і краіны ў цэлым пачынаецца з такіх маленькіх спраў як пасадзіць дрэва, прыбраць двор, у якім жывеш».

Масавая высадка новых дрэў і кустоў падчас восеньскіх суботнікаў у рэгіёне праводзіцца традыцыйна. Толькі ў Магілёве іх сёння высадзілі каля 2 тыс. Напрыклад, больш зялёнай стала тэрыторыя, прылеглая да кардыяхірургічнага і кардыятэрапеўтычнага корпуса Магілёўскай абласной клінічнай бальніцы і дарогі-дублёра па вул. Якубоўскага і Загараднай шашы. Кіпела праца па добраўпарадкаванні на важных сацыяльных аб’ектах, тэрыторыі прадпрыемстваў і арганізацый, на вуліцах і ў дварах жылых дамоў.

Да абласнога суботніка актыўна падключыліся ўсе раёны Прыдняпроўскага краю.

Вольга Емельянава