Афармленне зямлі, купля машыны ХМД. Ісачанка правёў выязны прыём грамадзян у Бялынічах

Жыхар Бялынічаў звярнуўся па дапамогу ў афармленні зямельнага ўчастка ў в.Мельнік, дзе ў яго размешчаны дом з гаспадарчымі пабудовамі, разбіты агарод і пчальнік. Мужчына карыстаецца участкам плошчай 30 сотак, з якіх толькі 15 аформлены афіцыйна. Заяўнік хоча аформіць на сябе ўсю зямлю, аднак у райвыканкаме яму тлумачаць, што гэта немагчыма, бо гэтыя тэрыторыі адносяцца да ляснога фонду.

Паводле слоў спецыялістаў галоўнага ўпраўлення землеўпарадкавання аблвыканкама, у архіве няма дакументаў, якія пацвярджаюць, на падставе якіх прадастаўляліся гэтыя зямельныя ўчасткі. На руках у мужчыны іх таксама няма, аднак зямельны падатак ён за іх плаціць - адсюль і выйшла непаразуменне. Калі вырашаць пытанне па прадастаўленні заяўніку яшчэ 15 сотак, то давядзецца змяняць межы тэрытарыяльна-адміністрацыйнай адзінкі. Працэс складаны і працяглы і ўключае ў сябе ў тым ліку грамадскае абмеркаванне. «Вывучым матэрыялы і прымем рашэнне», - рэзюмаваў старшыня аблвыканкама.

Жыхарка аг.Цехцін звярнулася па пытанні падтаплення зямельнага ўчастка падчас моцных ападкаў. Яна сцвярджае, што адбываецца змыванне вадой з праезнай часткі пяшчанай сумесі з камянямі і асфальтагрануляты на яе прыдамавую тэрыторыю. Аднак спецыялісты сцвярджаюць, што адталыя і дажджавыя воды ідуць на размешчаны ў нізіне ўчастак менавіта з сельскагаспадарчага поля. Старшыня аблвыканкама даручыў дэталёва разабрацца ў пытанні: калі пайдуць дажджы, усім зацікаўленым службам (дарожнікам, меліяратарам, МНС, прадстаўнікам мясцовай выканаўчай улады) выехаць на месца і вызначыць, адкуль ідзе вада. У залежнасці ад гэтага будзе прымацца адпаведнае рашэнне.

Жыхаркі в.Малы Кудзін прыйшлі да Анатоля Ісачанкі асабіста, каб выказаць падзяку кіраўніцтву аблвыканкама і райвыканкама за вырашэнне сацыяльна значных пытанняў, якія хвалявалі мясцовае насельніцтва. У іх малым населеным пункце для дзяцей абсталявана гульнявая пляцоўка, заасфальтавана вул.Маладзёжная, адсыпаны асфальтагранулятам пад'езд да магазіна і частка вул.Школьнай, праведзены капітальны рамонт шматкватэрнага жылога дома, абсталявана памяшканне на першым паверсе сельскага клуба, дзе дзеці займаюцца танцамі.

«Вялікі дзякуй ад усіх жыхароў вёскі, - падзякавалі заяўніцы. - У нас каля 500 жыхароў, з якіх 70 - дзеці. І нам вельмі трэба было гэтае добраўпарадкаванне. А мы ж нават не аграгарадок, а вёска. Але мы тут нарадзіліся, працуем, гадуем дзяцей і жадаем, каб наша малая радзіма развівалася. Мы некалі звярнуліся - і ўсе нашы пытанні вырашылі. Дзякуй ад чыстага сэрца».

Анатоль Ісачанка падкрэсліў, што ў першую чаргу за такое добраўпарадкаванне трэба дзякаваць Прэзідэнту, бо ў краіне паўсюдна падтрымліваюць малыя населеныя пункты і сельскія тэрыторыі. «Гэта даручэнне кіраўніка дзяржавы, - падкрэсліў ён. - Выдзелены грашовы рэсурс, мы працуем у гэтым кірунку і імкнемся ў вёсцы зрабіць усё па максімуме».

БЕЛТА