Аграрны эксперымент, канцэпцыя «Адзін раён - адзін праект». Дзмітрый Крутой наведвае Слаўгарадскі раён

Аграрны эксперымент, рэалізацыя канцэпцыі «Адзін раён - адзін праект», развіццё мясцовага турызму. Такія пытанні вынесены на парадак дня кіраўніком Адміністрацыі Прэзідэнта Дзмітрыем Крутым у час наведвання Слаўгарадскага раёна.

Зыходным пунктам стаў Слаўгарадскі райвыканкам і абмеркаванне пытання рэфармавання сельскагаспадарчых арганізацый шляхам іх узбуйнення на прыкладзе Слаўгарадскага, Чэрыкаўскага і Клічаўскага раёнаў Магілёўскай вобласці. Планы па рэалізацыі аграрнага эксперымента Дзмітрый Крутой агучваў раней на фестывалі-кірмашы «Дажынкі-2024» у Мікашэвічах.

У аснове рэфармавання - узбуйненне: у раёнах плануецца пакінуць літаральна тры-чатыры буйныя гаспадаркі, вакол якіх будзе сканцэнтравана ўся вытворчая і кадравая база. У адзін момант маштабаваць на ўсю краіну новы вопыт пакуль не будуць, абмяжуюцца кропкавымі прыкладамі. Мэта новаўвядзенняў - з меншай колькасцю рэсурсаў (працоўных, матэрыяльных) дабівацца больш сур'ёзных вынікаў. Для гэтага гаспадаркі-маякі будуць узбуйняцца і дафінансоўвацца з боку дзяржавы. Плануецца, што праз некалькі гадоў такая мадэль стане асновай беларускай аграрнай палітыкі.

«На прыкладзе трох раёнаў мы разглядаем рэфармаванне сельскагаспадарчых арганізацый шляхам узбуйнення і далучэння для аптымізацыі жывёлагадоўчых памяшканняў, матэрыяльна-тэхнічнай базы ў выглядзе тэхнікі, - адзначыў першы намеснік старшыні Магілёўскага аблвыканкама Сяргей Савіцкі. - У Слаўгарадскім раёне мы першыя крокі ўжо зрабілі, частка шляху пройдзена: з 10 гаспадарак засталося шэсць, а плануецца пакінуць чатыры буйныя аб'екты. Два іншыя раёны - Чэрыкаўскі і Клічаўскі - толькі на старце. Але пакуль гэта толькі планы».

Паводле слоў Сяргея Савіцкага, станоўчы момант такіх змяненняў у тым, што ў першую чаргу ідзе аптымізацыя кадраў. «Гэта і кіраўнікі, і спецыялісты, - падкрэсліў ён. - Сёння вельмі шмат дробных сельгасарганізацый і праблемна знайсці дастатковую колькасць кадраў - заатэхнікаў, ветэрынараў, аграномаў і  гэтак далей. Адпаведна, на невялікія гаспадаркі мы не можам забяспечыць дастойны ўзровень аплаты працы. А калі ідзе ўзбуйненне, мы ўжо можам падцягнуць нейкія дадатковыя рэсурсы, выканаць абяцанні ў частцы аплаты працы. Гэта практыка паступова ідзе па ўсёй краіне, але ў Магілёўскай вобласці яна закране практычна кожны раён».

Пасля абмеркавання пытанняў рэфармавання Дзмітрый Крутой плануе азнаёміцца з ходам рэалізацыі ў рэгіёне канцэпцыі «Адзін раён - адзін праект» на прыкладзе вытворчасці па выпуску жэлейнага мармеладу ВГУП «Чырвоны харчавік – Слаўгарад» і турыстычным патэнцыялам Слаўгарадскага раёна з наведваннем гідралагічнага помніка прыроды рэспубліканскага значэння «Блакітная крыніца».

БЕЛТА