Аграрыі Шклоўскага раёна плануюць завяршыць уборку збожжавых у бліжэйшыя два тыдні

Аграрыі Шклоўскага раёна плануюць завяршыць уборку збожжавых у бліжэйшыя два тыдні. Пра гэта расказаў першы намеснік старшыні - начальнік упраўлення па сельскай гаспадарцы і харчаванні Шклоўскага райвыканкама Аляксандр Кісялёў.

«У Шклоўскім раёне ўбрана ўжо 8,9 тыс. га збожжавых і зернебабовых культур пры плане больш за 23 тыс. га, - адзначыў Аляксандр Кісялёў. - Гэта 38 працэнтаў да плана пры сярэдняй ураджайнасці 39 ц/га. У раёне ёсць 86 камбайнаў, з іх штодзень у поле выходзяць каля 70 адзінак. Дробныя няспраўнасці тэхнікі аператыўна ўхіляем. Створана група пры ўпраўленні па сельскай гаспадарцы па кантролі за стратамі збожжа. Задача ўбраць якасна і без страт пастаўлена і будзе выканана ў канкрэтныя тэхналагічныя тэрміны. Нам неабходна яшчэ прыкладна 14 пагодлівых дзён, і збожжавую групу мы збяром. Тым больш мабілізаваны ўсе сілы, у тым ліку на ўборцы задзейнічаны работнікі прадпрыемстваў Шклова».

Паводле слоў Аляксандра Кісялёва, аператыўнасць на ўборачнай дасягаецца правільнай арганізацыяй працы і лагістыкай - камбайны, якія працуюць аддалена ад мехдвароў (больш за 1 км), начуюць прама ў полі, але абавязкова пад аховай. «Гэта неабходна, каб не марнаваць час і не марнаваць паліва на перагонку тэхнікі, - падкрэсліў кіраўнік. - Праца пастаўлена, знаходзіцца на кантролі».

Аграрыі Шклоўскага раёна не трацяць сёння ні хвіліны і з кожным днём нарошчваюць тэмпы ўборачнай. «Людзі матываваныя і зараджаныя на ўборку, забяспечаныя гарачым харчаваннем, спецвопраткай, - удакладніў Аляксандр Кісялёў. - Два дні таму ў нас ужо быў першы тысячнік у СП «Газавік-Сіпакава», ёсць тысячнік у ЗАТ «Вялікія Славені». На адвозцы збожжа з'явіліся вадзіцелі, якія перасягнулі рубеж 2 тыс. т, і гэта не апошнія вынікі. Вядома, сёлета надвор'е ўнесла свае карэктывы: у першую чаргу ўбіралі азімыя ячмені, а потым перайшлі да яравых. Цяпер убіраем азімую групу, плануем атрымаць па раёне сярэднюю ўраджайнасць збожжавых больш за 40 ц/га».

БЕЛТА