Акцыя «Мая мама – чараўніца» стартавала ў Магілёўскай вобласці

Акцыя «Мая мама – чараўніца» стартавала ў Магілёўскай вобласці. Праект ініцыяваны Магілёўскім абласным сацыяльна-педагагічным цэнтрам і прымеркаваны да Дня маці.

Для ўдзелу ў акцыі раённыя сацыяльна-педагагічныя цэнтры да 14 кастрычніка дасылаюць па 4 фатаграфіі з арыгінальнымі подпісамі, у якіх адлюстравана пазітыўнае стаўленне да мамы, рысаў яе характару. Крэатыў і гумар вітаюцца.

«Кожная мама крыху чараўніца. Па-іншаму ніяк нельга растлумачыць мамчыну здольнасць адным толькі словам ці поглядам падтрымаць, супакоіць, падняць настрой. Яе далікатныя рукі здольныя прагнаць хваробу і вярнуць выдатнае самаадчуванне. Яе ўсмешка замяняе сонца ў самыя хмурныя дні. А чаго толькі варта маміна здольнасць цудоўным чынам усё паспяваць, робячы тысячу спраў адразу!» – адзначылі арганізатары.

Фотаздымкі па меры іх паступлення будуць размяшчацца ў сацыяльнай сетцы Instagram у запісе @moya_mama_volshebnica.

Палажэнне аб правядзенні абласной сацыяльнай акцыі «Мая мама – чараўніца»

Рэд.