Спартыўнае свята для людзей сярэбранага ўзросту пройдзе ў Магілёве 2 кастрычніка

У Магілёве 2 кастрычніка пройдзе фізкультурна-аздараўленчае свята «Сцежка здароўя» да Дня пажылых людзей. Пра гэта расказала намеснік начальніка ўпраўлення па працы, занятасці і сацыяльнай абароне гарвыканкама Ірэна Каталікова.

Мерапрыемства збярэ каля 20 каманд па 10 чалавек - прадстаўнікоў ветэранскіх арганізацый, ветэранаў працы і ўсіх жадаючых старэйшага ўзросту, якія вядуць актыўны лад жыцця. Удзельнікаў чакаюць 10 відаў спаборніцтваў. Сёлета да традыцыйных дысцыплін дадаліся абноўленыя і новыя напрамкі. Сярод правераных - стральба з пнеўматычнай вінтоўкі, дартс і кольцакід. А сярод навінак - кульбута і іншыя займальныя і даступныя віды, у якіх змогуць прыняць удзел усе ахвочыя. Пасля заканчэння спаборніцтваў усіх удзельнікаў чакае цырымонія ўзнагароджання, кожнаму ўручаць грамату і сімвалічны прыз. Таксама гасцей пачастуюць салдацкай кашай і карыснымі фітачаямі.

«Галоўнае - падарыць зарад бадзёрасці і добры настрой. Для многіх гэта не проста свята, а магчымасць сустрэцца з сябрамі, паразмаўляць, правесці час на свежым паветры. Людзі чакаюць гэтае мерапрыемства, рыхтуюцца да яго і прыходзяць па клічы сэрца», - адзначыла Ірэна Каталікова.

У Магілёве для пажылых людзей арганізоўваецца вялікая колькасць разнастайных мерапрыемстваў: спартовыя, культурныя, патрыятычныя. «Марафон па скандынаўскай хадзьбе, наведванне Музея славы Магілёўшчыны, кірмашы вакансій, вечары адпачынку на свежым паветры. Усё гэта дапамагае падтрымліваць актыўнасць нашых грамадзян сярэбранага ўзросту, падкрэслівае іх важны ўдзел у жыцці соцыума», - рэзюмавала яна.

БЕЛТА