Аляксандр Гарошкін: работа дэпутатаў прызначана зрабіць жыццё беларусаў лепшым і больш змястоўным

Работа дэпутатаў прызначана зрабіць жыццё беларусаў лепшым і больш змястоўным. Такім меркаваннем з журналістамі падзяліўся член Савета Рэспублікі Нацыянальнага сходу, старшыня Магілёўскага абласнога Савета дэпутатаў Аляксандр Гарошкін на адкрыцці ІІ рэгіянальнага форуму «Мясцовае самакіраванне ў Магілёўскай вобласці: ініцыятыва, адзінства, дзеянне, вынік».

«Галоўная задача дэпутацкага корпуса - не проста выконваць свае абавязкі, якія ім дэлегаваў народ, а праяўляць пры гэтым творчасць і ініцыятыву, - адзначыў Аляксандр Гарошкін. - Таму форум стаў вялікай пляцоўкай, дзе дэпутаты рознага ўзроўню могуць абмяняцца меркаваннямі, падзяліцца лепшымі прыкладамі работы. Новаўвядзенне гэтага года - тэлемост з 17 суб'ектамі Расійскай Федэрацыі, якія зацікаўлены ва ўдзеле ў нашым форуме. Гэта абмен меркаваннямі і наладжванне сувязей. Але самае галоўнае, што ўся гэта работа накіравана на тое, каб жыццё нашых людзей зрабіць яшчэ лепшым і больш змястоўным».

На думку Аляксандра Гарошкіна, дэпутацкі корпус павінен даносіць да насельніцтва, што паляпшэнне якасці жыцця, развіццё рэгіёнаў - задача не толькі вертыкалі ўлады, але і ўсіх жыхароў краіны. «Мы павінны ўсяляк падтрымліваць ініцыятывы людзей, у тым ліку матэрыяльна і ўвасабляць іх у жыццё, - падкрэсліў ён. - Напярэдадні святкавання 80-годдзя Перамогі шмат ініцыятыў ад грамадзян паступае па ўвекавечанні памяці ветэранаў, і мы іх усяляк падтрымліваем, таму што мы добра разумеем, што такое сёння забыць нашу гісторыю. Шмат ініцыятыў датычацца добраўпарадкавання тэрыторый, і мы стараемся, каб яны былі ўвасоблены ў жыццё».

На думку дэпутата Палаты прадстаўнікоў Нацыянальнага сходу Галіны Бяляевай, не выпадкова лейтматывам форуму сталі словы «ініцыятыва, адзінства, дзеянне, вынік», паколькі прэзентаваныя тут пачынанні і праекты павінны знайсці адлюстраванне ў практычнай плоскасці. Прычым яны будуць рэалізаваны не толькі на карысць Магілёўскага рэгіёна, але і ўсёй краіны. «Мы стаім на пазіцыях пашырэння паўнамоцтваў органаў мясцовага самакіравання і стварэння такіх умоў, каб актыўныя грамадзяне мелі магчымасць удзельнічаць у вырашэнні важных для рэгіёна пытанняў», - падкрэсліла яна.

Толькі за люты - сакавік гэтага года ў Палату прадстаўнікоў паступіла каля 175 прапаноў ад насельніцтва па ўнясенні змяненняў у заканадаўчай сферы, над якімі сёння ідзе работа. Сярод іх шмат ініцыятыў датычылася пытанняў навядзення парадку на зямлі. «Беларусы хочуць бачыць свае гарады прыгожымі і добраўпарадкаванымі. І мне вельмі прыемна, што Магілёў заняў першае месца ў рэспубліканскім аглядзе санітарнага стану і добраўпарадкавання населеных пунктаў», - рэзюмавала Галіна Бяляева.

Форум у Магілёве праходзіць з 8 па 11 красавіка, яго ўдзельнікамі сталі больш за 200 чалавек - дэпутаты ўсіх узроўняў, органы выканаўчай улады і мясцовага самакіравання, маладзёжныя парламенты пры гарадскіх і раённых Саветах дэпутатаў, навучэнцы і студэнты. Мерапрыемства накіравана на кансалідацыю грамадства на месцах, уключэнне людзей, у тым ліку моладзі, у вырашэнне пытанняў мясцовага значэння. Таксама форум будзе садзейнічаць развіццю тэрыторый і фарміраванню пастаяннай зваротнай сувязі паміж уладай і насельніцтвам.

БЕЛТА