Аляксандр Лукашэнка і Уладзімір Пуцін прынялі сумесную заяву

Прэзідэнты Беларусі і Расіі Аляксандр Лукашэнка і Уладзімір Пуцін па выніках перагавораў у Маскве падпісалі сумесную заяву.

У дакуменце адзначаецца, што перагаворы прайшлі ў атмасферы дружбы, узаемаразумення і даверу, кіраўнікі дзяржаў абмеркавалі шырокі спектр актуальных пытанняў двухбаковага парадку дня і перспектыўныя напрамкі далейшага развіцця маштабнага беларуска-расійскага супрацоўніцтва.

Аляксандр Лукашэнка і Уладзімір Пуцін пацвердзілі саюзніцкі характар адносін паміж Беларуссю і Расіяй і нязменнасць курсу на пашырэнне стратэгічнага партнёрства ва ўсіх сферах. «Беларусь і Расія прадоўжаць паступальна нарошчваць двухбаковае гандлёва-эканамічнае і інвестыцыйнае супрацоўніцтва, у тым ліку ўзаемадзеянне ў сферах прамысловай кааперацыі і інфраструктурнага будаўніцтва», - гаворыцца ў сумеснай заяве.

Прэзідэнты заклікалі да далейшага развіцця міжпарламенцкіх і міжпартыйных сувязей, павышэння ролі парламенцкага сходу Саюза Беларусі і Расіі. Лідары дзвюх краін падтрымліваюць пашырэнне міжрэгіянальнага і прыгранічнага супрацоўніцтва.

У дакуменце таксама гаворыцца аб важнасці пашырэння гуманітарных сувязей і супрацоўніцтва, асаблівым значэнні сумесных намаганняў па патрыятычным выхаванні моладзі, а таксама па барацьбе з гераізацыяй нацызму і фальсіфікацыяй гісторыі.

Лідары краін пацвердзілі нацэленасць на паступальнае інтэграцыйнае будаўніцтва Саюзнай дзяржавы, умацаванне яе эканамічнага і тэхналагічнага патэнцыялу, фарміраванне агульнай прасторы ў сацыяльна-эканамічнай, гуманітарнай, абароннай, міграцыйнай, інфармацыйнай і іншых сферах, выраўноўванне правоў і свабод грамадзян і ўмоў дзейнасці суб'ектаў гаспадарання дзвюх краін.

«Бакі прадоўжаць нарошчваць сумесныя намаганні па эфектыўным рэагаванні на сучасныя выклікі і пагрозы ў мэтах умацавання бяспекі Беларусі і Расіі ў рамках агульнай абароннай прасторы Саюзнай дзяржавы», - гаворыцца ў заяве.

Адбыўся абмен граматамі аб ратыфікацыі Дагавора аб гарантыях бяспекі ў рамках Саюзнай дзяржавы, які пасля гэтага ўступіў у сілу.

У сумеснай заяве Аляксандр Лукашэнка і Уладзімір Пуцін адзначылі, што новыя ваенна-палітычныя рэаліі ствараюць неабходнасць фарміравання ўстойлівай сістэмы еўразійскай бяспекі, і ў тым ліку заклікалі іншыя краіны падтрымаць ініцыятыву аб распрацоўцы Еўразійскай хартыі разнастайнасці і шматпалярнасці ў XXI стагоддзі. У знешняй палітыцы Беларусь і Расія маюць намер садзейнічаць далейшаму фарміраванню шматпалярнай сістэмы міжнародных адносін, заснаванай на ўзаемнай павазе інтарэсаў і калектыўным вырашэнні міжнародных праблем.

У дакуменце таксама ўдзелена ўвага супрацоўніцтву ў рамках інтэграцыйных структур, гаворыцца аб намаганнях па паглыбленні інтэграцыйных сувязей і ўзаемадзеяння ў СНД і Еўразійскім эканамічным саюзе. Расія падзяляе і падтрымлівае прыярытэты старшынства Беларусі ў органах ЕАЭС у бягучым годзе.

Кіраўнікі дзяржаў прызнаюць вядучую ролю АДКБ у забеспячэнні рэгіянальнай стабільнасці і падкрэсліваюць нацэленасць на далейшае ўдасканаленне сістэмы калектыўнай бяспекі, у тым ліку ў рамках маючага адбыцца старшынства Расіі ў АДКБ у 2026 годзе.

Шанхайскую арганізацыю супрацоўніцтва Беларусь і Расія разглядаюць як аснову для фарміравання архітэктуры аднолькавай і непадзельнай бяспекі ў Еўразіі. Краіны маюць намер развіваць супрацоўніцтва ў рамках ШАС у сферах палітыкі, эканомікі і гуманітарных сувязей.

Кіраўнікі дзяржаў, вітаючы атрыманне Беларуссю ў 2024 годзе статусу дзяржавы - партнёра БРІКС, дамовіліся праводзіць рэгулярны абмен думкамі па пытаннях супрацоўніцтва ў рамках аб'яднання і выбудоўваць сістэмнае ўзаемадзеянне з ім Рэспублікі Беларусь.

Прэзідэнты Беларусі і Расіі захоўваюць прыхільнасць да ідэі гарманізацыі інтэграцыйных працэсаў у рэчышчы ініцыятывы Вялікага еўразійскага партнёрства, уключаючы лібералізацыю гандлёвых адносін, сумеснае развіццё транспартна-лагістычнай інфраструктуры і іншых сфер эканамічнага супрацоўніцтва.

Бакі маюць намер умацоўваць каардынацыю ў органах і структурах ААН, прадоўжаць супрацоўніцтва ў мэтах умацавання міжнароднага рэжыму нераспаўсюджвання ядзернай зброі.

Беларусь і Расія таксама пацвердзілі агульнасць падыходаў да забеспячэння бяспекі інфармацыйнай прасторы Саюзнай дзяржавы і ўмацавання яе тэхналагічнага суверэнітэту ў мэтах развіцця. Бакі зробяць неабходныя крокі ў мэтах хутчэйшага пачатку работы медыякампаніі Саюзнай дзяржавы.

У сумеснай заяве таксама асуджаецца санкцыйная палітыка ў розных яе формах. Падкрэсліваецца, што аднабаковыя прымусовыя меры, якія прымаюцца ў абход рэзалюцый Савета Бяспекі ААН, з'яўляюцца незаконнымі.

Прэзідэнты Беларусі і Расіі падпісалі Пагадненне аб мерах па ўзаемнай абароне грамадзян ад неабгрунтаванага праследавання замежнымі дзяржавамі і міжнароднымі органамі юстыцыі. У адпаведнасці з гэтым дагаворам бакі маюць намер сумесна змагацца з негатыўнай тэндэнцыяй палітызацыі сферы міжнароднага прававога супрацоўніцтва па крымінальных справах і садзейнічаць умацаванню агульнапрызнаных норм міжнароднага права, што датычацца суверэннай роўнасці дзяржаў і вынікаючых з гэтага імунітэтаў службовых асоб дзяржаў.

Бакі маюць намер і далей каардынаваць пазіцыі адносна дзейнасці НАТА і яе краін-членаў, накіраванай на стварэнне выклікаў і пагроз бяспецы і інтарэсам Беларусі і Расіі. Да найбольш дэстабілізуючых дзеянняў краін НАТА, якія правакуюць самыя сур'ёзныя стратэгічныя рызыкі, бакі перш за ўсё адносяць варожыя крокі ў кантэксце ўкраінскага крызісу, што тояць у сабе небяспеку прамога ўзброенага канфлікту ядзерных дзяржаў, планы па разгортванні ў Еўропе амерыканскіх ракет сярэдняй і меншай далёкасці наземнага базіравання, нарошчванне проціракетных патэнцыялаў, што фарміруюць і забяспечваюць еўрапейскі сегмент глабальнай сістэмы проціракетнай абароны ЗША, размяшчэнне ваеннай інфраструктуры і істотных баявых сіл на рубяжах Саюзнай дзяржавы, а таксама інтэнсіфікацыю ваеннай дзейнасці ў раёнах судакранання, развіццё схем і патэнцыялаў так званых сумесных ядзерных місій НАТА, якія абапіраюцца на разгорнутую ў Еўропе амерыканскую ядзерную зброю.

Кіраўнікі дзяржаў асудзілі агрэсіўна-канфрантацыйны характар палітыкі Еўрапейскага саюза ў адносінах да Беларусі і Расіі, умяшанне ва ўнутраныя справы, прымяненне аднабаковых санкцый, у тым ліку экстэрытарыяльнага характару, у парушэнне Статута ААН. Падкрэсліваецца, што такія меры наносяць урон міжнароднаму і ўстойліваму развіццю, а палітычны націск, што аказваецца на трэція краіны пры дапамозе нелегітымных санкцыйных механізмаў, недапушчальны.

Аляксандр Лукашэнка падзякаваў Прэзідэнту Расіі Уладзіміру Пуціну за цёплы прыём і запрасіў яго наведаць Беларусь з візітам.

БЕЛТА