Аляксандр Старавойтаў: чацвёртая хваля каранавіруса не стала для нас нечаканасцю, мы да яе рыхтаваліся

Пра тое, як спраўляюцца з чацвёртай хваляй COVID-19 у рэгіёнах, расказаў начальнік галоўнага ўпраўлення па ахове здароўя Магілёўскага аблвыканкама Аляксандр Старавойтаў у эфіры праграмы «Панарама» на «Беларусь 1».

– Медыцына, як і ўсе экстранныя службы, павінна знаходзіцца ў пастаяннай гатоўнасці. І чарговая хваля не з’явілася для нас якой-небудзь нечаканасцю. Да яе мы рыхтаваліся. На сённяшні дзень у нас каля 10 600 ложкаў, якія размяшчаюцца на тэрыторыі ўстаноў аховы здароўя Магілёўскай вобласці. Больш за 2300 кропак кіслароду, больш за 270 апаратаў ШВЛ. Дастатковая колькасць урачоў, медыцынскіх сясцёр, якія могуць аказаць меддапамогу ў любых умовах, – падкрэсліў Аляксандр Старавойтаў.

Спецыяліст дадаў, што апошнія некалькі тыдняў у Беларусі з-за штаму віруса «дэльта» быў рэзкі ўздым захворвання. Аднак, па словах Старавойтава, на гэтым і наступным тыдні чакаецца стабілізацыя працэсу з наступным зніжэннем захворвання:

– У гэтую хвалю мы маем такі інструмент, як вакцына. Яна дапамагае правесці спецыфічную прафілактыку захворвання. Паглядзеўшы на тых пацыентаў, якія знаходзяцца ва ўстановах аховы здароўя вобласці, палічыўшы колькасць (колькі ў нас вакцынаваных лечыцца ў бальніцах і колькі невакцынаваных), магу сказаць, што вакцынаваных у нас не больш за 1,5%. З тых людзей, якія ляжаць у рэанімацыі, няма ніводнага вакцынаванага. Гэта значыць, што вакцына сёння з’яўляецца інструментам, які дазваляе захворванню працякаць у лёгкай форме, – сказаў Аляксандр Старавойтаў.

Начальнік галоўнага ўпраўлення па ахове здароўя Магілёўскага аблвыканкама таксама расказаў аб працы рэгіянальных штабоў па рэагаванні на сітуацыю з каранавірусам:

– Штаб – гэта калектыўны орган, які каардынуе ўсе сілы, накіраваныя на барацьбу з COVID-19. Гэта не толькі лячэнне, але і прафілактыка, адсочванне кантактаў першага ўзроўню, вызначэнне сіл і сродкаў, неабходных для барацьбы з каранавіруснай інфекцыяй. Неабходна перабудаваць прадпрыемства на вытворчасць сродкаў абароны – і штаб дае каманду на перапрафіляванне дадзеных прадпрыемстваў. Размеркаванне сіл і сродкаў медыцыны – гэта наша прэрагатыва. Мы таксама ўваходзім у гэты штаб.

СБ