Анатоль Ісачанка: гісторыя нашай Радзімы рабілася і робіцца людзьмі працы

Урачыстая цырымонія ўручэння пасведчанняў аб занясенні на абласную Дошку гонару прайшла сёння ў Магілёве. Гэтага гонару ўдастоены 22 прадпрыемствы, арганізацыі, установы, якія дасягнулі па выніках працы ў 2021 годзе высокіх паказчыкаў, пяць пераможцаў Нацыянальнага конкурсу «Прадпрымальнік года». А таксама пераможцы штогадовага абласнога конкурсу па прысваенні ганаровага звання «Чалавек года Магілёўшчыны» па выніках працы за 2021 год, гарады і раёны, якія сталі пераможцамі спаборніцтва па сацыяльна-эканамічным развіцці сярод гарадоў і раёнаў Магілёўскай вобласці за 2021 год.

Адкрываючы ўрачыстае мерапрыемства, старшыня Магілёўскага аблвыканкама Анатоль Ісачанка павіншаваў усіх са Святам працы і адзначыў, што Першамай – гэта не толькі даніна традыцыям, але і выдатная магчымасць заахвоціць тых, хто сваімі працоўнымі перамогамі фарміруе аблічча сучаснай Магілёўшчыны.

«Святкаванне 1 Мая пацвярджае высокую грамадзянскую адказнасць, патрыятызм і згуртаванасць беларускага народа, – працытаваў словы кіраўніка дзяржавы Анатоль Ісачанка. – Гэта асабліва важна ў сённяшніх няпростых эканамічных умовах, калі ад эфектыўнай працы і самааддачы кожнага залежыць трываласць нашай дзяржавы, яе незалежнасць і суверэнітэт. Сёння мы ўшаноўваем нашых перадавікоў у розных галінах народнай гаспадаркі і заносім іх імёны на абласную Дошку гонару. Усіх іх аб’ядноўвае адно жаданне і ўменне – добра працаваць. Сярод іх найлепшыя з найлепшых. Тыя, хто сваімі ведамі і навыкамі, любоўю да прафесіі памнажае працоўную славу рэгіёна.

Сёння мы адзначаем таксама маладых спецыялістаў у сацыяльнай сферы, прадстаўнікоў студэнцкай і навучэнскай моладзі, тых, хто сваёй працай, талентам і мэтанакіраванасцю заслужыў права быць найлепшым. Іх дасягненні гавораць пра тое, што ў нашай краіне створаны ўсе ўмовы для таго, каб кожны мог спаўна рэалізаваць сябе і дамагчыся поспеху.

Гісторыя нашай Радзімы рабілася і робіцца людзьмі працы. Мы ганарымся тым, што Прыдняпроўскі край уносіць важкі ўклад у паступальнае развіццё нашай дзяржавы».

Старшыня аблвыканкама падзякаваў жыхарам рэгіёна за добрасумленную працу і пажадаў ім здароўя, міру і дабрабыту.

У межах мерапрыемства таксама адбылася цырымонія ўручэння спецыяльнай прэміі Магілёўскага аблвыканкама ў сацыяльнай сферы. З прысваеннем звання «Лаўрэат спецыяльнай прэміі Магілёўскага абласнога выканаўчага камітэта ў сацыяльнай сферы» з уручэннем адпаведнага дыплома. Прэміі ўдастоена 50 прадстаўнікоў сферы культуры і мастацтва, сродкаў масавай інфармацыі, грамадска-палітычнай дзейнасці, аховы здароўя, адукацыі, спорту і турызму, сацыяльнай абароны насельніцтва.

Акрамя таго, у гэты дзень былі ўручаны ўзнагароды ад Магілёўскага абласнога аб’яднання прафсаюзаў. За значны ўклад у развіццё і ўмацаванне сацыяльнага партнёрства, за актыўную працу па абароне сацыяльна-працоўных правоў і законных інтарэсаў членаў прафсаюза, шматгадовую добрасумленную працу і прафесійнае майстэрства адзначана прафсаюзным знакам пашаны дзевяць прадстаўнікоў працоўных калектываў рэгіёна.

Суправаджала ўрачыстую цырымонію творчая праграма.

Юлiя Таранава, Фота Галіны Гаўрыловіч