Анатоль Ісачанка: мясцовыя ўлады павінны больш уважліва падыходзіць да разгляду зваротаў грамадзян

Мясцовыя ўлады павінны больш уважліва працаваць са зваротамі грамадзян, прымаць больш узважаныя рашэнні. Такое меркаванне выказаў старшыня Магілёўскага абласнога выканаўчага камітэта Анатоль Ісачанка пасля выязнога прыёму, які ён сёння правёў у Касцюковічах.

– На мой погляд, сур’ёзных пытанняў не было, – сказаў Анатоль Міхайлавіч. – Усе звароты тычыліся нейкіх бытавых праблем, і іх цалкам можна вырашаць на ўзроўні старшыні райвыканкама. Фактычна яны і вырашаны на ўзроўні раёна. Толькі некалькі пытанняў патрабуе нашых сумесных намаганняў, я маю на ўвазе па фінансаванні ці іншых момантах. Таму, калі людзі звяртаюцца з праблемамі да мясцовай улады, прадстаўнікі апошняй павінны больш уважліва падыходзіць да разгляду гэтых пытанняў, прымаць больш узважаныя рашэнні. Як, дапусцім, па Хоцімскім раёне, жыхарка якога атрымала бюджэтныя грошы і пабудавала дом. У адпаведнасці з законам яна павінна вызваліць занятае жыллё, каб туды засялілася наступная сям’я або каб даную жылплошчу перавялі ў статус арэнднай. Не, жанчына на працягу некалькіх гадоў працягвае хадзіць і звяртацца з гэтым пытаннем. Пры тым, што адбыўся суд, які пастанавіў: яна не права. У гэтым выпадку мясцовыя ўлады, вядома, павінны былі прыняць больш жорсткае рашэнне, хоць бы абапіраючыся на рашэнне суда.

Усяго падчас прыёму было разгледжана пяць зваротаў жыхароў Касцюковіцкага, Хоцімскага і Крычаўскага раёнаў, якія тычыліся неналежнага стану дарог, працаўладкавання, суседскіх сварак.

Жыхаркі вёскі Студзянец Касцюковіцкага раёна гаварылі пра ўладкаванне сістэмы водазабеспячэння: яны не хочуць аплачваць работы з уласных сродкаў. У населеным пункце зараз 76 домаўладанняў, дзе зарэгістравана 142 чалавекі. Для патрэб водазабеспячэння ў вёсцы маецца 12 калодзежаў, але ў сямі з іх вада не адпавядае санітарным нормам. Тройчы на тыдзень вяскоўцам падвозяць якасную пітную ваду, а ў 2021 годзе Касцюковіцкі водаканал праклаў водаправодную магістральную сетку да Студзянца. Спрэчны момант заключаецца ў тым, што падключэнне домаўладанняў да сеткі мясцовым жыхарам прапанавалі за іх грошы.

Адказ Анатоля Ісачанкі быў адназначным: агульны водаправод і калонкі павінны быць абсталяваны за дзяржаўны кошт. Калі ж хто-небудзь з вяскоўцаў хоча падвесці ваду ў дом, то ўжо павінен плаціць з уласнай кішэні.

– Сітуацыя, калі глядзець у прыватнасці, на гэтым этапе вырашана. Калі ж глядзець увогуле, то яшчэ, на жаль, застаюцца вёскі, у якіх адсутнічае водаправод. Праблема вядомая, працуем над яе рашэннем. Зразумела, не паспяваем зрабіць гэта ўсім адначасова, але пэўны рух наперад у гэтым напрамку ёсць. Хацелася б і ў складчыну дзесьці працаваць, каб паскорыць працэс. Напрыклад, мы падводзім асноўную магістраль, а людзі – некаторыя невялікія ўчасткі. Нараўне з усталяваннем водаправода па праграме «Чыстая вада» займаемся ўстаноўкай станцый абезжалезвання, што паляпшае якасць абслугоўвання насельніцтва. Што тычыцца іншых пытанняў, якія прагучалі падчас прыёму, паўтаруся, яны бытавыя і будуць вырашаны на мясцовым узроўні, – сказаў на заканчэнне старшыня аблвыканкама.

 СБ