Аспекты цеплавой мадэрнізацыі шматкватэрных будынкаў абмеркавалі ў Магілёве

У Магілёўскім бізнес-цэнтры «Атрыум» адбыўся семінар па аспектах цеплавой мадэрнізацыі шматкватэрных будынкаў і інфармацыйна-тлумачальнай працы з уласнікамі жылля. Ён праводзіўся ў межах кансультацыйнай работы па пашырэнні ўстойлівага энергакарыстання пры падтрымцы Сусветнага банка.

Арганізатарамі мерапрыемства выступілі Дэпартамент па энергаэфектыўнасці РБ сумесна з прадстаўніцтвам Сусветнага банка. Семінар праводзіўся для спецыялістаў ЖКГ Магілёўскай вобласці.

Дырэктар Дэпартамента па энергаэфектыўнасці Міхаіл Малашанка адзначыў у сваім выступленні, што сёння самая дарагая паслуга ў краіне – ацяпленне жылля. Сумарны кошт цеплавой энергіі, якую спажывае насельніцтва рэспублікі ў год, складае каля 1 мільярда долараў ЗША на год. Дзяржава субсідуе гэтыя выдаткі ў раёне $ 750 млн. (каля 80%). У выніку насельніцтва аплачвае толькі каля 20% ад сабекошту цеплавой энергіі. Штогод жыллёва-камунальныя паслугі даражэюць прыкладна на 5 долараў, з іх 3 прыпадае на цяпло. Але, на думку Малашанкі, насельніцтва краіны можа зэканоміць за кошт рэгулявання падачы цяпла, а таксама ўцяплення дома. Гэтыя неабходныя меры прапісаны ў прэзідэнцкім указе № 327 «Аб павышэнні энергаэфектыўнасці шматкватэрных дамоў», у якім вызначаны механізм цеплавой мадэрнізацыі дамоў і парадак долевага ўдзелу грамадзян.

Указ дае магчымасць жыхарам правесці ў 2020–2025 гадах цеплавую мадэрнізацыю, атрымаўшы растэрміноўку аплаты на 10–15 гадоў і да 50% бязвыплатнай субсідыі. Уцяпліць дом можна, калі такое рашэнне на добраахвотнай аснове прымуць ўласнікі жылля на агульным сходзе больш чым дзвюма трэцімі галасоў. Пад дзеянне дакумента ў першую чаргу падпадуць дамы, якія стаяць у чарзе на капітальны рамонт: каля 100 «шматпавярховак» у Магілёве, Бабруйску, Асіповічах і Быхаве. З іх 25 шматкватэрных дамоў знаходзіцца ў Магілёве, 34 – у Бабруйску.

Паводле слоў спецыяліста па энергетыцы Сусветнага банка Ірыны Вайцяховіч, на энергаэфектыўныя меры (яны не ўваходзяць у капрамонт) з агульнага бюджэту праекта плануецца вылучыць каля $60 млн. Жыхарам прапануюць два пакеты энергаэфектыўных мер – «А» (частковая мадэрнізацыя) і «Б» (комплексная мадэрнізацыя). Першы прадугледжвае пабудову аўтаматызаванага індывідуальнага цеплавога пункта, тэрмастатычных рэгулятараў на батарэі пры іх адсутнасці, замену ўваходных дзвярэй у пад’езды на дзверы з аўтаматычным даводчыкам, вокнаў у месцах агульнага карыстання.

Пакет «Б» больш шырокі. Да пералічаных работ дадаецца ўцяпленне вонкавых сцен, паддахавага і цокальнага перакрыццяў, замена вокнаў у кватэрах (пры неабходнасці). Дадаткова і ў першым, і ў другім варыянце можна ўстанавіць размеркавальнікі цеплавой энергіі на батарэі з дыстанцыйнай перадачай інфармацыі. Калі рэгулятары дазваляюць памяншаць тэмпературу, то размеркавальнікі – плаціць за энергію зыходзячы з яе фактычнага спажывання кватэрай. Магчымыя таксама розныя камбінацыі, прадугледжаныя пакетамі «А» і «Б» – канчатковае рашэнне будзе залежаць ад жыхароў. Праект знаходзіцца на выніковым этапе ўзгаднення, падпісаны пагадненні з міжнароднымі арганізацыямі. Чакаецца, што ўсе дакументы ўступяць у сілу ў сакавіку 2020 года.

Віталь Крэцкі, начальнік аддзела прававой інфармацыі і камунікацыі Дэпартамента па энергаэфектыўнасці, адзначыў, што на сайце Дэпартамента ў раздзеле «Актуальна» размешчана і будзе размяшчацца ўся неабходная тлумачальная інфармацыя, якая тычыцца ўказа № 327 і цеплавой мадэрнізацыі жылля.

mogilevnews.by