Астанкі 16 байцоў Чырвонай арміі знайшлі пошукавікі экспедыцыі «Проня-2023»

Астанкі 16 байцоў Чырвонай арміі знайшлі пошукавікі «Віккру» падчас экспедыцыі «Проня-2023», якая праходзіла ў Чавускім раёне. Пра гэта расказала метадыст Магілёўскага абласнога цэнтра творчасці і начальнік штаба гісторыка-патрыятычнага пошукавага клуба «Вікру» Святлана Барысенка.

Пошукавікі праводзілі работы сумесна з ваеннаслужачымі 52-га спецыяльнага батальёна Міністэрства абароны ў раёне населеных пунктаў Кузьмінічы, Ужжар, Цёплае, Ляхаўшчына і Сутокі. «Нам удалося выявіць і падняць астанкі 16 байцоў і камандзіраў Чырвонай арміі. На жаль, падчас гэтай экспедыцыі не было знойдзена ніводнага імяннога медальёна», - распавяла яна.

Сярод цікавых знаходак - падпісная рэч. «На знойдзеным у раскопе супрацьгазе, на яго пластыкавым элеменце, мы знайшлі надрапаны надпіс: «23 сакавіка 1942 года. На памяць Назараву Аляксандру Міхайлавічу ад Гулінай Антаніны Фёдараўны». Мы мяркуем, што Аляксандр Міхайлавіч быў ужо дасведчаным байцом, насіў званне сяржанта. Бо са скарачэння «с-т» і пачынаецца гэты надпіс», - распавяла Святлана Барысенка.

«Праца па ўстаноўцы байца Назарава ўсё яшчэ працягваецца. Непадалёк ад месца выяўлення астанкаў ёсць помнік, на якім выгравіравана імя Аляксея Назарава. Верагодна, недзе памыліліся з імем - Аляксандр і Аляксей сугучныя. Але многія іншыя моманты, якія мы шукаем у архіўных дакументах, разыходзяцца. А таму яшчэ трэба вывучыць нямала інфармацыі, каб ужо са стоадсоткавай упэўненасцю заявіць, ён гэта ці не», - распавёў Ілля Трыханаў, заняты працай па пацверджанні асобы Аляксандра Назарава.

У яшчэ адным раскопе віккруўцы знайшлі партыйны білет. «Над ім доўга «чараваў» камандзір пошукавай групы «Дняпроўскі рубеж» і адзін з самых дасведчаных пошукавікаў Павел Кончыкаў. На жаль, унутраная частка партбілета не захавалася ці яна была вырваная і выкінутая. Бо ў выпадку траплення ў палон, камандзіраў і камуністаў фашысты адразу ж расстрэльвалі, - распавяла Святлана Барысенка. - Павел правёў велізарную працу па рэстаўрацыі вокладкі партбілета - зараз яна выглядае ідэальна для 80-гадовага захоўвання ў зямлі».

У планах у пошукавікаў - яшчэ адна экспедыцыя. Яна стартуе 11 верасня ў Магілёўскім раёне.

Акрамя гэтага, наперадзе цырымоніі ўрачыстага перапахавання знойдзеных астанкаў. Пройдуць яны 13 верасня ў Шклоўскім раёне. Тут на цырымонію чакаюць вялікая колькасць сваякоў загінуўшых чырвонаармейцаў, а таксама прадстаўнікоў пошукавага руху Расійскай Федэрацыі.

За амаль трыццацігадовую гісторыю клуба «Вікру» пошукавікам удалося падняць з зямлі астанкі каля 1,7 тыс. байцоў і камандзіраў Чырвонай арміі. З іх удалося ўстанавіць асобы 141 героя.

БЕЛТА