Азнаямленчую практыку больш за 60 першакурснікаў БДСГА пажадалі прайсці ў сельгаспрадпрыемствах Горацкага раёна

Поўнае пагружэнне ў прафесію

Азнаямленчая практыка з поўным пагружэннем. Такі фармат выбралі студэнты факультэта механізацыі сельскай гаспадаркі Беларускай дзяржаўнай сельскагаспадарчай акадэміі. Звычайна першая практыка ў ВНУ праходзіць так: рабяты наведваюць з экскурсіямі розныя сельгаспрадпрыемствы, каб атрымаць уяўленне аб будучай прафесіі. Разумеючы, што дапамога студэнтаў у такую гарачую пару патрэбна, акадэмія накіравала ў гаспадаркі Горацкага раёна падмацаванне - восем студатрадаў. Хлопцы і нават дзяўчаты дапамагалі ставіць тэхніку на захоўванне, наводзілі парадак на мехдварах. Сельгаспрадпрыемствам – дапамога, для студэнтаў – першы досвед працы.

Ідэя адпраўляць на першую практыку першакурснікаў адразу на аграпрадпрыемствы з'явілася на факультэце механізацыі сельскай гаспадаркі ў мінулым годзе.

– Мэта - пазнаёміць учарашніх школьнікаў з будучай прафесіяй. А дзе гэта лепей зрабіць? Вядома, на рэальнай вытворчасці. Такая ідэя супала з патрэбамі раёна, - заўважае дэкан факультэта механізацыі сельскай гаспадаркі БДСГА Уладзімір Гусараў. - Восень - напружаная пара: механізатары пераходзяць на ўборку кукурузы. У той жа час трэба ставіць збожжаўборачныя камбайны на захоўванне. У гэтай гаспадарцы і дапамагаюць нашыя студэнты. Самае галоўнае, што яны з першага дня вучобы пачынаюць знаёміцца з вытворчымі працэсамі, бачаць знутры, якія патрабаванні будуць прад'яўлены да іх, калі ўжо пасля размеркавання прыйдуць на працу ў арганізацыі АПК.

Сёлета ў традыцыйна мужчынскіх студатрадах ажно пяць першакурсніц. Адразу тры дзяўчынкі пайшлі ў ААТ «Маслакі». Валерыя Дзмітрыева, Анастасія Кашалёва і Вікторыя Палякова працуюць нароўні з хлопцамі. Кажуць, нават прыйшлося пазмагацца за месцы, каб патрапіць у гаспадарку:

– Жадаючых было вельмі шмат. Але мы сказалі, што нам, дзяўчынкам, больш патрэбна, - смяецца Вікторыя, якая на вучобу прыехала з Гарадка. - Мужчынскі калектыў і ў акадэміі, і ў гаспадарцы нас не бянтэжыць: і пажартаваць можна, і прафесійнай рады спытаць. На практыку ішла з вялікай цікавасцю. Паглядзела, як арганізавана работа ў гаспадарцы, даведалася спецыфіку. Нам дапамагалі вопытныя спецыялісты: не толькі давалі заданні, але і расказвалі, як уладкована і функцыянуе сельгастэхніка. Часу сумаваць не было.

Валерыя Дзмітрыева з Баранавічаў таксама чакала практыку. Складаная прылада тэхнікі, кажа, не палохала, бо звязаная з ёй, лічы, з дзяцінства:

– Тата заўсёды браў мяне з сабой у гараж, разам з ім перабіралі машыны. Тэма так захапіла, што вырашыла паступаць на інжынера. Не скажу, што гэта асабліва мужчынская прафесія. З 24 чалавек у нашай групе пяць дзяўчынак. Значыць, цікавасць да спецыяльнасці ёсць і з боку жаночай аўдыторыі. Сельская гаспадарка - перспектыўны кірунак. У нашай краіне гэта галіна адна з найважнейшых. Ды і ў БДСГА вучыцца прэстыжна: адна справа скончыць універсітэт, іншая - акадэмію. Да таго ж паглядзіце, колькі таленавітых спецыялістаў падрыхтавала ВНУ. Акадэмію скончыў кіраўнік дзяржавы.

На полі каля мехдвара ААТ «Маслакі» ў лінейку выстраены збожжаўборачныя камбайны. Сваё ў гэтым сезоне адпрацавалі, зараз іх трэба паставіць на захоўванне. У тэхнікі круцяцца хлопцы з мехатрада. Камандзір Уладзіслаў Собаль заўважае, што ў гаспадарцы ўсё па-даросламу: працоўны дзень з дзевяці да пяці з абедам, аўтобус прывозіць на працу і забірае.

– Ужо ставілі на захоўванне сеялкі, зараз заканчваем са збожжаўборачнымі камбайнамі. З задачамі спраўляемся, - кажа першакурснік.

Уладзіслаў - мінчанін. Спрабаваў паступіць у сталічную ВНУ, але не прайшоў па конкурсе. Задумаўся, куды ісці вучыцца. Бацькі скончылі БДСГА, Улад вырашыў не парушаць традыцыю.

А вось Аляксандр Мартынаў з вёскі Пласток Любанскага раёна ў Мінск не імкнуўся. Даведаўшыся, што ў БДСГА добры палігон, салідны парк тэхнікі, адразу вызначыўся з будучым месцам вучобы. У Сашы амаль уся сям'я звязана з сельскай гаспадаркай: бацька працаваў на трактары, два браты - механізатары. Тэхніка заўсёды цікавіла.

- Камбайны, вядома, бачыў, але вось рыхтаваць да пастаноўкі на захоўванне не даводзілася. А ў гаспадарцы можна было вывучыць усе элементы, перагледзець кожную шрубку. Вопыт класны, а мы ж толькі на першым курсе, - задаволены Аляксандр.

Галоўны інжынер ААТ «Маслакі» Андрэй Цімашэнка задаволены падмацаваннем:

- Жаданне працаваць у першакурснікаў ёсць. Для іх гэта магчымасць спасцігаць прафесію на справе, на рэальнай вытворчасці. Стараемся дапамагаць, падказваць. Моладзь цікавіцца, задае пытанні. Змена расце годная!

СБ