Азнаёміцца з унікальным выставачным праектам можна будзе на форуме «М.@rt кантакт»

Выставачны праект «Павел Масленікаў. Тэатр вачыма мастака» будзе праходзіць у рамках правядзення XVIII Міжнароднага маладзёжнага тэатральнага форуму «M.@rt кантакт». Пра гэта расказалі ў Магілёўскім абласным мастацкім музеі ім. П.У. Масленікава.

Азнаёміцца з экспазіцыямі можна будзе на дзвюх пляцоўках - у Магілёўскім драмтэатры і музеі Масленікава. Тут кожны наведвальнік зможа ўбачыць эскізы дэкарацый і касцюмаў знакамітага мастака ў розных тэхніках з архіваў Нацыянальнага акадэмічнага Вялікага тэатра оперы і балета Рэспублікі Беларусь і фондаў Мастацкага музея, тэатральныя касцюмы Магілёўскага абласнога драматычнага тэатра, а таксама архіўныя фота.

Як расказалі субяседнікі, выстаўка прадставіць свет тэатра як шматгранны творчы працэс, дзе неад'емную і важную ролю адыгрываюць майстры пэндзля, увасабляючы яго ва ўнікальных вобразах, дэкарацыях, антуражы.

«Менавіта з тэатра пачаў свой творчы шлях Народны мастак Рэспублікі Беларусь Павел Масленікаў, паступіўшы ў 1938 годзе на пасаду мастака-дэкаратара ў Дзяржаўны тэатр оперы і балета Беларусі, пасля заканчэння Віцебскага мастацкага вучылішча, - падзяліліся ў музеі. - Дваццацігадовы перыяд працы ў тэатры для Паўла Масленікава стаў часам станаўлення, творчых напрацовак, сустрэч і супрацоўніцтва са знакамітымі рэжысёрамі, кампазітарамі, мастакамі і артыстамі. Тэатр з'яўляўся для мастака другім домам і майстэрняй, раскрыў усе таямніцы і сфарміраваў Паўла Васільевіча як асобу.

Мастак аформіў спектаклі «Трыльбі» А.Юрасоўскага, «Бахчысарайскі фантан» Б.Асаф'ева, «Праданая нявеста» Б.Смятаны, «Салавей» М.Крошнера, «Дэман» А.Рубінштэйна, «Іаланта» П.Чайкоўскага, «Страшонскі барон» І.Штраўса і многія іншыя. Таксама Масленікаў удзельнічаў у падрыхтоўцы спектакляў у Беларускім дзяржаўным тэатры імя Янкі Купалы і Дзяржаўным рускім драматычным тэатры Беларусі імя Максіма Горкага».

Даведачна: праект падрыхтавалі Мастацкі музей імя П.У. Масленікава сумесна з Заслужаным калектывам Рэспублікі Беларусь «Магілёўскі абласны драматычны тэатр» і пры ўдзеле Нацыянальнага акадэмічнага Вялікага тэатра оперы і балета Рэспублікі Беларусь.

Рэд.