«Бабруйскаграмаш» прэзентаваў машыну для падачы вады і тушэння лясных пажараў

ААТ «Кіруючая кампанія холдынгу “Бабруйскаграмаш”» прэзентавала новую машыну для падачы вады і тушэння лясных пажараў. Пра гэта паведамілі ў прэс-службе прадпрыемства.

«Навінка распрацоўвалася з улікам пажаданняў спецыялістаў лясной гаспадаркі. Машына МЖТ-3 (П) прызначана для аўтаномнай загрузкі і падачы вады ва ўмовах абмежаванага доступу да месцаў прымянення і водных рэсурсаў. Для забеспячэння водазабору і падачы вадкасці машына ўкамплектавана гразевай маторнай помпай, якая дазваляе ажыццяўляць забор вады з глыбіні 8 м і падаваць яе на вышыню да 25 м», – расказалі ў прэс-службе.

Для павышэння функцыяналу машына абсталявана шпулькай з 20-метровым пажарным рукавом і пажарным ствалом РСП-50. «Гэта дазваляе выкарыстоўваць нашу навінку як сродак дастаўкі вады да ачагоў узгарання з магчымасцю тушэння пажару з адлегласці не менш за 15–20 м. Пры ўзнікненні надзвычайных сітуацый помпа дапускае выкарыстанне любой тэхнічнай вады, у тым ліку – з прыродных вадаёмаў з забруджанымі часціцамі да 30 мм», – адзначылі спецыялісты.

Новая машына атрымалася вельмі мабільнай. Яе можна выкарыстоўваць у сельскай мясцовасці, лясных гаспадарках, ва ўмовах бездарожжа і цяжкадаступных месцах. Яна падыходзіць для трактароў цягавага класа 1,4 і больш.

«Навінка выклікала вялікую цікавасць у прадстаўнікоў лесагаспадарчых устаноў. Барысаўскі вопытны лясгас ужо пакінуў заяўку на набыццё двух машын», – расказалі ў прэс-службе «Бабруйскаграмаша».

БЕЛТА