Рус Бел Eng 中文

Барыс Бурда правядзе на «Вялікай бард-рыбалцы» конкурс-шоу на лепшы бутэрброд

Конкурс на лепшы бутэрброд пройдзе 27 ліпеня падчас X Міжнароднага музычнага фестывалю «Вялікая бард-рыбалка», паведамілі ў аргкамітэце мерапрыемства.

Удзельнічаць у конкурсе зможа любы ахвотны. Усім прадаставяць аднолькавы набор абсталявання і прадуктаў харчавання. Удзельнікі будуць змагацца ў абавязковай і адвольнай праграмах. Спачатку яны павінны будуць прыгатаваць бутэрброды з прадукцыі мясных партнёраў творчага праекта – Магілёўскага мясакамбіната і гандлёвай маркі «Гродфуд», а затым адбудзецца адвольная праграма: для ўдзелу ў гэтай намінацыі можна выкарыстоўваць любыя прадукты, у тым ліку набытыя на фестывалі або прывезеныя з сабой.

Конкурс стартуе на пляцоўцы «Адэскі дворык» у 11.00. Удзельнікі за паўгадзіны да пачатку павінны заняць месцы за сталамі, выбраць прадукты і атрымаць рыштунак, каб быць своечасова гатовымі да старту. Па камандзе вядучага конкурсу Барыса Бурды – вядомага ўдзельніка інтэлектуальнай гульні «Што? Дзе? Калі?», аўтара і вядучага кулінарнай тэлепраграмы «Смачна з Барысам Бурдой» – канкурсанты пачынаюць прыгатаванне бутэрбродаў. На гэта ім адводзіцца ўсяго 20 хвілін.

«Мэтай конкурсу з’яўляецца павышэнне кулінарнай культуры гледачоў і ўдзельнікаў фестывалю «Вялікая бард-рыбалка», а таксама абмен вопытам вырабу найбольш простых, карысных і смачных бутэрбродаў у паходных умовах, дэманстрацыя кулінарнага майстэрства ўдзельнікаў фестывалю і экспрэс-навучанне некаторым нюансам кулінарнага мастацтва ўсіх жадаючых», – адзначыў Барыс Бурда.

Для ўдзелу ў конкурсе рэкамендуецца загадзя накіраваць заяўку ў адвольнай форме з указаннем кантактных дадзеных на адрас: matsikova.olga@yandex.ru. Можна зарэгістравацца і падчас фестывалю на пляцоўцы «Адэскі дворык», калі будуць вольныя месцы. Пераможцаў чакаюць спецыяльныя дыпломы, каштоўныя прызы і памятныя сувеніры ад партнёраў фестывалю. А першыя пяць чалавек, якія падалі заяўкі, атрымаюць яшчэ і прадуктовыя наборы ад гандлёвай маркі «Гродфуд».

«Вялікая бард-рыбалка» стартавала ў 2010 годзе і стала візітоўкай музычна-фестывальнага жыцця Магілёўскай вобласці. За 9 гадоў форум наведалі больш за 15 тыс. гледачоў, музыкаў і артыстаў з 14 краін: Беларусі, Расіі, Украіны, Малдовы, Польшчы, Славакіі, Германіі, Чэхіі, Ізраіля, ЗША, Літвы, Латвіі, Італіі, Балгарыі.

Генеральны партнёр праекта – ААТ «Магілёўскі мясакамбінат», афіцыйны партнёр – булачна-кандытарская кампанія «Домочай», інфармацыйныя партнёры – БЕЛТА, «СБ. Беларусь сегодня», «Альфа Радыё», тэлеканал СТВ, тэлерадыёкампанія «Магілёў» і інфармацыйнае агенцтва «Магілёўскія ведамасці».

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая