Басейн, ліфт, масажны кабінет: новы дзіцячы сад адкрылі ў Бабруйску

У Бабруйску адчыніў дзверы новы яслі-сад № 85, разлічаны на 240 месцаў.

Дашкольная ўстанова размешчана ў новым жылым мікрараёне Маладзёжны. У 2020 годзе тут быў адкрыты дзіцячы сад на 240 месцаў з басейнам, у 2021м – сярэдняя школа № 35 з басейнам. «Увод яшчэ аднаго аб’екта адукацыі – важная і значная падзея для жыхароў новага мікрараёна, – сказала начальнік упраўлення адукацыі Бабруйскага гарвыканкама Алена Лісіца. – Дашкольная ўстанова стала сапраўдным падарункам для бабруйскіх мам і тат, бо ў гэтым раёне пражывае шмат маладых сем’яў, у тым ліку і шматдзетных. Новы сад дазволіць знізіць сацыяльную напружанасць і рэалізаваць прынцып крокавай даступнасці ўстаноў дашкольнай адукацыі». У дзіцячым садзе адкрыта 13 груп, адна з якіх будзе спецыяльнай для дзяцей з парушэннем функцый апорна-рухальнага апарата. Кожная група абсталявана неабходнай мэбляй, мяккім і гульнявым інвентаром, тэлевізарамі, стацыянарнымі і перасоўнымі дошкамі. Ва ўстанове прадугледжаны рэсурсныя цэнтры для захоўвання метадычнай літаратуры і наглядных дапаможнікаў.

Ва ўстанове маецца басейн з адной чашай для заняткаў з выхаванцамі ва ўзросце ад 3 да 7 гадоў, усталяваны ліфт, створана безбар’ернае асяроддзе, у тым ліку для перамяшчэння дзяцей-калясачнікаў. Медыцынскі блок дадаткова абсталяваны кабінетамі фізіятэрапіі і масажу.

Для арганізацыі адукацыйнага працэсу ўладкаваны музычны, спартыўны і гімнастычныя залы, а таксама кабінеты педагога-псіхолага, дэфектолага і метадычны. Акрамя таго, абсталяваны кабінет для заняткаў па бяспецы жыццядзейнасці.

На тэрыторыі ўстановы размешчаны пляцоўкі з навесамі для кожнай групы, а таксама для заняткаў фізкультурай, ёсць гульнявое і спартыўнае абсталяванне, дарожкі для язды на роварах і самакатах.

У Бабруйску працуе 63 установы дашкольнай адукацыі, у якіх выхоўваецца амаль 9,1 тыс. дзяцей.

БЕЛТА, фота bobrlife.by