Беларусь і Расія заўсёды праяўлялі адкрытасць і чалавекалюбства ў адносінах адзін да аднаго - Павел Жуйкоў

Дзень яднання народаў Беларусі і Расіі - нагляднае пацвярджэнне адкрытасці і прыязнасці нашага народа. Такой думкай падзяліўся старшыня Магілёўскай абласной арганізацыі Беларускага прафсаюза работнікаў мясцовай прамысловасці і камунальна-бытавых прадпрыемстваў Павел Жуйкоў.

- Гэтае свята - сведчанне цёплых і брацкіх адносін паміж нашымі блізкімі народамі, - кажа Павел Анатольевіч. - Ва ўзаемаадносінах нашых дзяржаў у постсавецкі перыяд здараліся розныя сітуацыі, але нязменным пры любых абставінах заставалася прыхільнасць да прынцыпаў гуманізму і справядлівасці, павага да памяці продкаў, беражлівыя адносіны да гераічнага мінулага савецкага народа-пераможцы. У моманты цяжкіх падзей і выпрабаванняў заўсёды выяўлялася наша адкрытасць і чалавекалюбства ў адносінах адзін да аднаго, аказвалася дапамога і словам і справай, пацвярджэннем чаго сталі і нядаўнія трагічныя падзеі ў Падмаскоўі.

Разважлівасць беларусаў, імкненне рабіць усё ўдумліва і ўзважана дазволілі выбудаваць цёплыя ўзаемаадносіны з усімі суседзямі, лічыць суразмоўца:

- На жаль, сёння гэтыя адносіны з шэрагам краін сталі заложнікам амбіцый і залежнасці ад знешніх сіл іх лідэраў. Тым больш каштоўны вопыт выбудоўвання шчырых добрасуседскіх адносін з дзяржавамі, якія паважаюць суверэнны выбар іншых народаў, і, перш за ўсё, з Расійскай Федэрацыяй. Паважлівыя адносіны адзін да аднаго, адкрытае супрацоўніцтва, узаемавыручка беларускага і расійскага народаў - безумоўны прыклад выбудоўвання адносін паміж дзяржавамі на аснове агульных гуманістычных каштоўнасцей і прынцыпаў.

СБ