Беларусь на дзіцячым «Еўрабачанні – 2020» прадставіць магіляўчанка Арына Пехцерава

Беларусь на дзіцячым конкурсе песні «Еўрабачанне – 2020» прадставіць магіляўчанка Арына Пехцерава. Такая інфармацыя размешчана ў Telegram-канале АТН.

У адпаведнасці з рэкамендацыямі, каб пазбегнуць масавага збору людзей, забяспечваючы абарону здароўя артыстаў і членаў іх каманд, Белтэлерадыёкампаніяй было прынята рашэнне аб выбары прадстаўніка Беларусі на конкурсе шляхам унутранага адбору. Па выніках дэталёвага разгляду ўсіх заявак краіну на дзіцячым «Еўрабачанні – 2020» прадставіць Арына Пехцерава з песняй «Прышэльцы». Сцэнічны нумар будзе запісаны ў студыі «600 метраў» Белтэлерадыёкампаніі.

«Песня была напісана яшчэ вясной, калі ў свеце пачалася эпідэмія каранавіруса. Яе сэнс просты: свет спыніўся, межы зачыніліся, людзі больш не могуць мець зносіны, прыязджаць адзін да аднаго ў госці, нават дзіцячае «Еўрабачанне» сёлета стала іншым. Але я веру, што будучыня ў нашых руках, і менавіта мы, дзеці, зможам выратаваць гэты свет, зрабіць яго лепшым!» – сказала Арына Пехцерава.

Юная выканаўца нарадзілася 14 сакавіка 2008 года ў Магілёве. З ранняга дзяцінства займаецца музыкай. У 6 гадоў пачала браць урокі вакалу, а ў 8 гадоў паступіла ў музычную школу па класе фартэпіяна. Захапляецца маляваннем і фатаграфіяй. Складае вершы, спрабуе сябе ў ролі кампазітара. Двойчы стыпендыят спецыяльнага фонду Прэзідэнта па падтрымцы таленавітай моладзі.

З 2014 года Арына Пехцерава ўдзельнічае і перамагае ў многіх рэспубліканскіх і міжнародных вакальных конкурсах і фестывалях. Прымае ўдзел у дабрачынных канцэртах для дзяцей і пажылых людзей. Узнагароджана сярэбраным медальёнам «Сусветнай асацыяцыі фестываляў “WAF”».

Арына Пехцерава прымала ўдзел у такім прэстыжным тэлепраекце, як «Голас. Дзеці», неаднаразова станавілася фіналісткай нацыянальных адбораў на дзіцячае «Еўрабачанне».

Сёлета ў сувязі з пандэміяй каранавіруса Еўрапейскі вяшчальны саюз прыняў беспрэцэдэнтнае рашэнне аб правядзенні дзіцячага конкурсу песні «Еўрабачанне – 2020» у новым фармаце – у эфіры будуць гучаць загадзя запісаныя кампазіцыі ўдзельнікаў шоу. Галоўныя прычыны – арганізацыя бяспекі дзяцей ва ўмовах пандэміі, а таксама немагчымасць прысутнасці дэлегацый у краіне-арганізатары конкурсу ў сувязі з закрыццём межаў.

Дзіцячы конкурс песні «Еўрабачанне – 2020» пройдзе 29 лістапада. Прамую трансляцыю будуць весці тэлеканалы «Беларусь 1» і «Беларусь 24».

БЕЛТА