Беларуская сельгасакадэмія падтрымлівае высокую планку ў падрыхтоўцы студэнтаў – Юрый Мажайскі

Беларуская дзяржаўная сельскагаспадарчая акадэмія падтрымлівае вельмі высокую планку ў падрыхтоўцы студэнтаў і карыстаецца вялікай павагай як у Беларусі, так і за мяжой. Пра гэта сказаў галоўны навуковы супрацоўнік Усерасійскага навукова-даследчага інстытута гідратэхнікі і меліярацыі, выкладчык экалагічных дысцыплін у Разанскім дзяржаўным агратэхналагічным універсітэце, доктар сельскагаспадарчых навук, прафесар Юрый Мажайскі падчас пашыранага пасяджэння Савета акадэміі, прысвечанага 180-годдзю Акадэміі.

Юрый Мажайскі ў свой час скончыў сельгасакадэмію ў Горках. «Выпускнікі сельгасакадэміі высока цэняцца не толькі ў Беларусі, але і ў суседніх краінах, – адзначыў Юрый Мажайскі. – Я нарадзіўся ў Горацкім раёне, пасля заканчэння ВНУ з’ехаў у Расію, дзе працую і цяпер. Я заўсёды з гонарам гаварыў, што я выпускнік акадэміі ў Горках. І тая адукацыя, якую я атрымаў тут, стала асновай для далейшага росту. Я трапіў у навуку, прайшоў вялікі шлях. І магу вам сказаць, што беларуская адукацыя дазваляе быць універсальнай: за час свайго выкладання я папрацаваў у самых розных ВНУ. Зараз я выкладаю і ў роднай акадэміі – дапамагаю тым, хто таксама плануе звязваць сваё жыццё з навукай. І хочацца адзначыць, што і цяпер наша ВНУ падтрымлівае вельмі высокую планку ў падрыхтоўцы студэнтаў і карыстаецца вялікай павагай як у Беларусі, так і за мяжой».

Павіншаваць адну з найстарэйшых ВНУ Беларусі прыехала каля 200 гасцей з усёй рэспублікі: прафесары ВНУ Беларусі, Расіі, кіраўнікі разнастайных арганізацый і прадпрыемстваў краіны і іншыя. «Акадэмія прайшла вельмі вялікі шлях. І зараз яна працягвае дынамічна развівацца і ісці ў нагу з часам. Сюды з’язджаюцца студэнты з розных краін, і гэта гаворыць аб высокім узроўні падрыхтоўкі будучых спецыялістаў», – падзяліўся Юрый Мажайскі.

Падчас пасяджэння Савета акадэміі запрошаныя госці ўручылі падарункі ВНУ, узнагароды выкладчыкам і супрацоўнікам акадэміі, пажадалі далейшага росквіту і развіцця. «Наша акадэмія – найстарэйшая аграрная ВНУ Еўропы, Беларусі і Расіі. І зараз вы працягваеце быць моцнай і магутнай навучальнай установай. Вы працягваеце быць запатрабаванымі ў грамадства. І ў гэтым заслуга моцнага і творчага калектыву ВНУ», – адзначыў падчас віншавання намеснік старшыні Прэзідыума Нацыянальнай акадэміі навук Аляксандр Кільчэўскі.

На працягу ўсяго дня ў Беларускай дзяржаўнай сельскагаспадарчай акадэміі будуць праходзіць ўрачыстыя і святочныя мерапрыемствы.

БЕЛТА