Беларускі інвестыцыйны форум збярэ 24-25 мая ў Бабруйску больш за 500 удзельнікаў

Беларускі інвестыцыйны форум збярэ 24-25 мая ў Бабруйску больш за 500 удзельнікаў. Пра гэта паведамілі ў Магілёўскім аблвыканкаме.

Форум праводзіцца штогод па даручэнні беларускага ўрада. Мерапрыемства стане пляцоўкай для ўзаемадзеяння і камунікацыі беларускіх і замежных дзелавых колаў, шырока прадставіць замежным інвестарам патэнцыял для развіцця і вядзення бізнесу ў нашай краіне. Па падліках арганізатараў, форум збярэ больш за 500 удзельнікаў. У іх лік увойдуць прадстаўнікі выканаўчай улады і бізнэсу, лідэры меркаванняў у сферы прадпрымальніцтва, рэзідэнты вольных эканамічных зон.

У праграме мерапрыемства прадугледжаны дзелавыя сустрэчы і экспертныя дыскусіі, у час якіх удзельнікі абмяняюцца вопытам работы ў новых геапалітычных умовах, атрымаюць інфармацыю аб перспектыўных эканамічных нішах і патэнцыйных інвестпраектах для рэалізацыі ў Беларусі. У якасці бонуса ім будуць дадзены бясплатныя кансультацыі і аналітычныя матэрыялы на тэму вядзення бізнесу ў нашай краіне.

Плануецца, што ў спіс асноўных спікераў увойдуць першы намеснік прэм'ер-міністра Беларусі Мікалай Снапкоў, міністр эканомікі Аляксандр Чарвякоў, старшыня Магілёўскага аблвыканкама Анатоль Ісачанка. Форум пройдзе на дзвюх пляцоўках у Бабруйску - гасцініца «Турыст» і Магілёўскі абласны тэатр драмы і камедыі ім. В.І.Дуніна-Марцінкевіча.

Увазе гасцей мерапрыемства будзе арганізавана выстаўка прамысловай прадукцыі, канферэнцыя кіраўнікоў рэгіёнаў, на якой абмяркуюць тэмы знешняга гандлю, прыцягнення інвестыцый, стварэння індустрыяльных паркаў, развіцця інфраструктуры, выканання паказчыкаў сацыяльна-эканамічнага развіцця.

Па асобнай праграме адбудуцца XIV Міжнародны эканамічны форум «Млын поспеху» і міжнародны аматарскі гольф-турнір Minsk Golf Invitational 2023. У ліку спадарожных тэматычных мерапрыемстваў тры секцыі: «Імпартазамяшчэнне або тэхналагічны суверэнітэт», «Турыстычныя патокі: новыя рашэнні», «Інстытуты развіцця: час інсайтаў». Тут абмяркуюць, якія магчымасці адкрываюць заходнія санкцыі для прамысловай кааперацыі краін ЕАЭС, які імпульс неабходны для інавацыйнага развіцця стратэгічна важных галін беларускай эканомікі, як прыцягнуць інвестараў для новых укладанняў у турыстычныя аб'екты.

БЕЛТА