Безбар'ернае асяроддзе для людзей з абмежаванымі магчымасцямі створана ў сельскай бальніцы Магілёўскага раёна

Сёння, 24 ліпеня, у Княжыцкай сельскай участковай бальніцы УАЗ «Магілёўская паліклініка № 11» увялі ў эксплуатацыю грузапасажырскі ліфт, які дапаможа стварыць безбар'ерныя ўмовы для тых, хто праходзіць лячэнне на другім паверсе.

Бальніца ў Княжыцах разлічана на 68 ложкаў, яна адзіная з сельскіх бальніц Магілёўскай вобласці, дзе могуць лячыцца і людзі з абмежаванымі магчымасцямі, у тым ліку калясачнікі. Для такіх пацыентаў тут створана безбар'ернае асяроддзе — пандусы, зала лячэбнай фізкультуры, фізіятэрапеўтычны кабінет і кабінет масажу, спецыяльна прыстасаваныя санітарныя пакоі.

На першым паверсе бальніцы размешчана 15 ложкаў для пацыентаў неўралагічнага профілю, на другім - тэрапеўтычнае аддзяленне і ложкі для медыка-санітарнай дапамогі.

Улічваючы, што многія тутэйшыя пацыенты - людзі з абмежаванымі магчымасцямі, а таксама пажылога ўзросту, перасоўваюцца яны з цяжкасцю, а некаторыя і зусім прыкаваныя да ложка. Пераносіць хворых з паверха на паверх на насілках персаналу бальніцы было вельмі няпроста, наспела вострая неабходнасць у грузапасажырскім ліфце.

Галоўны ўрач паліклінікі № 11 Сяргей Караеў расказаў:

— Дзякуючы падтрымцы Магілёўскага аблвыканкама мы грузапасажырскі ліфт для Княжыцкай сельскай участковай бальніцы спраектавалі і пабудавалі, гэта каштавала 519 тысяч рублёў. Такім чынам, зараз поўнасцю створаны безбар'ерныя ўмовы і для тых, хто праходзіць лячэнне на другім паверсе.

СБ