Больш за 100 школьнікаў спаборнічаюць у фінале рэспубліканскага конкурсу «АгранТры Беларусь» у Горках

На базе Беларускай дзяржаўнай сельскагаспадарчай акадэміі ў Горках гэтымі днямі праходзіць фінал другога рэспубліканскага конкурсу «Агрантры Беларусі».

У мінулым годзе інтэлектуальнае спаборніцтва выклікала сапраўдны рэзананс, таму на гэты раз спектр удзельнікаў значна пашырыўся. З больш як 500 дзяцей, якія зарэгістраваліся, у фінал па выніках мікраконкурсаў і завочнага этапа запрошаны 104 чалавекі з усіх куткоў краіны.

Пераможцаў вызначаць у пяці намінацыях: «ДобраПЧЕЛ» – прымяненне лічбавых тэхналогій у традыцыйным пчалярстве; «АграКОСМАС» – выкарыстанне касмічных здымкаў і вэб-ГІС-тэхналогій; «АграБІЯ» - біялагічная абарона ад хвароб і шкоднікаў сельскагаспадарчых культур; «АграПРАЦЫ» - аўтаматызаваныя сістэмы кіравання тэхнікай; «АграМЕТЭА» - прагназаванне надвор'я, стварэнне архіва надвор'я, аналітыка.

Заданні дастаткова няпростыя, выходзяць за рамкі школьнай праграмы, падкрэслівае арганізатар Андрэй Гарноўскі:

- Прыйсці і з бухты-барахты выйграць конкурс амаль нерэальна. Трэба рыхтавацца. Для гэтага загадзя ствараем лекцыі і навучальныя матэрыялы, якія размяшчаем на спецыяльна створанай платформе. Дзеці штудзіруюць іх на працягу месяца і здаюць тэсціраванне завочна. Мы аналізуем вынікі і вызначаем фіналістаў, якіх запрашаем на выніковае мерапрыемства. Ужо для гэтых юнакоў закладваем дадатковыя лекцыі для падрыхтоўкі ў конкурсе.

Цікавы факт: калі на завочным этапе «Агрантры Беларусь» удзельнікаў дзеляць па ўзроставых катэгорыях, то ў фінале такая градацыя не патрабуецца.

— Як паказаў досвед, дзеці малодшага ўзросту нярэдка адказваюць лепш старэйшых таварышаў, таму спаборнічаюць з імі на роўных умовах. Таксама радуе, што аграрная тэматыка цікавая не толькі сельскім школьнікам, але і гарадскім хлопцам і дзяўчатам, - удакладняе Андрэй Анатольевіч.

Дзевяцікласнікі Анастасія Лазько і Віталь Маркаў з аграгарадка Заполле Клічаўскага раёна спрабуюць поспех у намінацыі «ДобраПЧЕЛ».

- Як па мне, пчолы - гэта вельмі цікава і пазнавальна, - кажа дзяўчына. - Прызнаюся, да конкурсу пра іх ведала вельмі мала, але падчас падрыхтоўкі паглыбілася ў тэму. Напрыклад, убачыла, як робяцца рамкі. Аказалася, гэта займальны працэс. Атрыманыя веды хутка буду прымяняць на практыцы. Справа ў тым, што знаёмы нашай сям'і пераязджае ў Заполле і перавозіць з сабой пчальнік. Ён абяцаў, што я змагу дапамагаць з пчоламі.

Антон Лапацкі і Цімур Жыжыкін, якія прадстаўляюць Шаркаўшчыну, прыехалі на «Агрантры» другі раз. І зноў выбралі намінацыю «АграПРАЦЫ». Антон разважае:

- У мінулы раз удалося перамагчы, што пакінула прыемнае ўражанне. Таксама вельмі спадабалася атмасфера, новы досвед, новыя знаёмствы. Дык навошта адмаўляць сабе ў задавальненні перажыць гэта зноў? Тэмай робатаў мы літаральна гарым. У школе ёсць секцыя робататэхнікі, дзе разам з педагогам спрабуем самастойна нешта майстраваць, распрацоўваць. Нядаўна спраектавалі мадэль казкі «Чырвоная шапачка» на новы лад. Зразумелая справа, усе персанажы тамака былі робатамі. Мы з Цімурам толькі перайшлі ў дзявяты клас, але ўжо ведаем, што пасля школы выберам напрамак, звязаны з робататэхнікай. А ў рамках сельскай гаспадаркі будзем працаваць ці ў іншай сферы, справа пятая.

Прызы пераможцам «Агрантры Беларусь» абяцаюць добрыя. За трэцяе месца школьнікам уручаць смарт-гадзіны, за другое — бесправадныя навушнікі, а пераможцам дастануцца планшэты.

- Нашай акадэміі і сельскай гаспадарцы ў цэлым гэты конкурс патрэбны, каб паказаць школьнікам - аграпрамысловы комплекс на дадзеным этапе высокатэхналагічны, з сучасным абсталяваннем і машынамі, з годнымі заробкамі, - адзначыла дэкан агратэхналагічнага факультэта БДСГА Наталля Дуктава. — Можна шмат расказваць аб тым, што стэрэатыпы «сельскі, значыць, адсталы» даўно састарэлі, што мы расцём і развіваемся, але лепш адзін раз паказаць. Фіналісты могуць памацаць коптары, якія выкарыстоўваюцца ў сельскай гаспадарцы, убачыць, як адбываецца кіраванне экасістэмай прадпрыемства праз планшэт, пераканацца, што дакладнае земляробства забяспечваецца праз навігацыйныя сістэмы без удзелу чалавека. Насыцілі і спадарожную праграму. Яна ўключае майстар-класы па розных напрамках, экскурсіі па студэнцкім гарадку і батанічным садзе, трэнінгі, прагулку на трактары з аўтапілотам і магчымасць пастраляць з страйкбольнай зброі!

СБ