Больш за 300 работ з 47 краін прадставяць на фестывалі «Анімаёўка» ў Магілёве

Міжнародны фестываль анімацыйных фільмаў «Анімаёўка» пройдзе ў Магілёве 24-26 верасня. Пра гэта паведамілі на Магілёўскім абласным вытворчым унітарным прадпрыемстве «Кінавідэапракат».

Усяго на ўдзел у фестывалі заяўлена 317 работ. У асноўным конкурсе прадстаўлены 248 фільмаў, у конкурсе дзіцячай анімацыйнай творчасці - 69. Свае работы даслалі аўтары з Беларусі, Аўстраліі, Вялікабрытаніі, Германіі, Кітая, Расіі, ЗША, Францыі, Японіі і іншых краін. Таксама ў фестывалі ўдзельнічаюць кінематаграфісты з В'етнама, Трынідада і Табага. У праграму дададзена новая намінацыя – «Лепшы анімацыйны серыял».

Урачыстае адкрыццё творчага форуму пройдзе 24 верасня ў 14.00 у кінатэатры «Радзіма».

У дні фестывалю гледачоў чакаюць паказы конкурсных праграм, творчыя сустрэчы і разнастайныя майстар-класы.

Цырымонія закрыцця фестывалю адбудзецца 26 верасня.

Пасля заканчэння агляду лепшыя фільмы можна будзе ўбачыць у кінатэатрах Беларусі і іншых краін у рамках спецыяльнага праекта «Рэха «Анімаёўкі».

БЕЛТА