Больш за 37% жыхароў Магілёўскай вобласці атрымалі прышчэпку ад COVID-19

Больш за 37% жыхароў Магілёўскай вобласці атрымалі прышчэпку ад COVID-19. Пра гэта паведаміла галоўны дзяржаўны санітарны ўрач рэгіёна Святлана Нячай.

«На сённяшні дзень у Магілёўскай вобласці прышчэпкамі ад COVID-19 ахоплена больш за 37% жыхароў вобласці – гэта амаль 365 тыс. чалавек. З іх поўны курс вакцынацыі прайшлі амаль 264 тыс. чалавек (27, 5%)», – патлумачыла Святлана Нячай.

Больш актыўна вакцынацыя праходзіць у Крычаўскім раёне – тут прышчэпку атрымаў практычна 51% жыхароў. У Клімавіцкім раёне гэты паказчык склаў 47,5%. У Дрыбінскім і Глускім раёнах ад каранавіруса вакцынавалася 42% жыхароў, у Бабруйску і Бабруйскім раёне – 41,5%.

Па словах Святланы Нячай, запатрабаванасць прышчэпак ад каранавіруснай інфекцыі ў рэгіёне не ўпала. «Людзі слухаюць і аналізуюць інфармацыю, якую распаўсюджвае Міністэрства аховы здароўя і Магілёўская абласная ахова здароўя, санслужбы. Таксама прыслухоўваюцца да сваіх знаёмых, якія ўжо перанеслі гэта захворванне. І вядома, большасць ідзе па прышчэпку, бо гэтая самая даступная мера абароны, – адзначыла яна. – Для правядзення вакцынацыі ў рэгіёне ў нас маецца дастатковая колькасць вакцыны, медыцынскага персаналу. Акрамя стацыянарных, працуюць пункты вакцынацыі на вакзале, у гандлёвых цэнтрах Магілёва».

Акрамя гэтага, у рэгіёне пачалася рэвакцынацыя грамадзян, якія завяршылі поўны курс прышчэпак ад каранавіруса больш за паўгода таму. І людзі актыўна цікавяцца, дзе і як можна прайсці паўторны курс прышчэпак ад кавіду. Акрамя гэтага, у рэгіёне актыўна ідзе вакцынацыя ад грыпу. Людзі клапоцяцца пра сваё здароўе, стан сваіх блізкіх, таму не грэбуюць прышчэпкамі», – падкрэсліла Святлана Нячай.

Паводле апошніх звестак, у рэгіёне зніжаецца колькасць захворванняў на каранавірусную інфекцыю, менш шпіталізацыі. «У гэтым вялікая заслуга нашых грамадзян. Жыхары Магілёва, усёй вобласці працягваюць выконваць масачны рэжым там, дзе немагчыма выканаць меры сацыяльнага дыстанцыяваньня: у гандлёвых аб’ектах, транспарце, месцах вялікага скаплення людзей. Грамадзяне разумеюць неабходнасць захавання ўсіх рэкамендаваных супрацьэпідэмічных мер. Сфарміраваць калектыўны імунітэт і перамагчы каранавірус можна толькі такім комплексным падыходам. І я хачу падзякаваць усім жыхарам нашай вобласці за адказнае стаўленне да свайго здароўя і здароўя навакольных людзей», – падагульніла Святлана Нячай.

БЕЛТА