«Больш за 600 стобальных вынікаў». Сёння стануць вядомы вынікі першага ЦЭ

Сёння стануць вядомы вынікі цэнтралізаванага экзамену ад 26 мая па 14 профільных вучэбных прадметах. Аб гэтым паведамілі ў прэс-службе Міністэрства адукацыі.

У цэнтралізаваным экзамене па 14 профільных вучэбных прадметах, які адбыўся 26 мая, прынялі ўдзел 56,9 тыс. выпускнікоў школ. «Удзельнікі іспыту паказалі дастаткова добрыя вынікі. Максімальна магчымы вынік 100 балаў па профільных вучэбных прадметах у асноўны дзень правядзення ЦЭ змаглі атрымаць 622 навучэнцы, у 2024 годзе такіх было 636. Стабальнікі ёсць па 13 вучэбных прадметах. Больш за ўсё максімальных вынікаў па матэматыцы - 175. Не змаглі справіцца з экзаменацыйнай працай (атрымалі нуль балаў) 64 выпускнікі, у 2024 годзе такіх таксама было 64 чалавекі», - распавялі ў ведамстве.

Сярэднія балы па ўсіх вучэбных прадметах перавысілі адзнаку пяцьдзесят балаў. Так, сярэдні бал па матэматыцы склаў 60,9 бала, па хіміі - 63,4, па гісторыі Беларусі - 65,9, па грамадазнаўстве - 58,7, па фізіцы - 65,9. «Колькасць выпускнікоў, якія па выніках ЦЭ атрымалі адзнакі 9 і 10, добра карэлюе ў працэнтных адносінах з гадавымі школьнымі адзнакамі. Колькасць выпускнікоў, якія па выніках ЦЭ атрымалі нездавальняючыя адзнакі, нязначная. Тыя выпускнікі, якія не змаглі прыняць удзел у цэнтралізаваным іспыце ў асноўныя тэрміны, змогуць прайсці яго ў рэзервовыя дні», - дадалі ў міністэрстве.

Сёлета рэзервовымі днямі правядзення ЦЭ вызначаны 21 і 23 чэрвеня, якія сумешчаны з рэзервовымі днямі цэнтралізаванага тэсціравання. Інфармацыю аб выніках ЦЭ можна атрымаць у асабістым кабінеце на сайце Рэспубліканскага інстытута кантролю ведаў.

БЕЛТА