«Будзем з кармамі ў засеках»: у Круглянскім раёне ідзе сяўба кукурузы

Вясновыя палявыя работы ў краіне ў самым разгары. Аграрыі ААТ «Круглянскі Рассвет» кажуць, што багатыя мы павінны быць не толькі хлебам на сталах, але і кармамі ў засеках. У гаспадарцы пад кукурузу на сілас выдзелілі больш за 650 га, з якіх 100 га ўжо засеяна пад зерне.

Сёлета позняя вясна ўнесла карэкціроўкі ў работу аграпрамысловага комплексу: пасяўная ў Круглянскім раёне пачалася крыху пазней, чым звычайна, але ўсе гаспадаркі набралі патрэбны тэмп. Работнікі «Круглянскага Рассвета» ўпэўненыя: ні хвіліны нельга губляць, без увагі нельга пакінуць ніводны кавалак зямлі.

Для механізатара Пятра Рулякова пасяўная - справа добра знаёмая. «Я ў гэтай гаспадарцы ўжо больш за 16 гадоў працую. Для нас кожны сантыметр зямлі важны. Дзякуючы гэтай зямлі грошы можна зарабляць, хлеб гадаваць, кармамі забяспечваць жывёлу. Калі мы сёння якасна не пасеем ураджай - заўтра не накормім жывёлу. А гэта значыць, што мы застанемся не толькі без хлеба, але і малака і мяса. Тут жа ўсё завязана, а таму такога сцэнара дапускаць нельга, - падзяліўся ён. - Праца ў полі нялёгкая, і яна не ведае сезоннасці. Зімой займаешся тэхнікай, прыводзіш яе ў парадак. Дапамагаю карміць жывёлу, працую на падмене. Як толькі прыходзіць надвор'е, у нас пачынаюцца гарачыя дні».

Праца пачынаецца з 6 раніцы. Рабочы дзень - 12 гадзін. «Перад выхадам у поле - тэхабслугоўванне трактара, трэба ўсё праверыць і паглядзець. Пасля ўжо ў поле зайшоў і паехаў. Гаспадарка забяспечвае нас гарачымі абедамі і вячэрамі, падвозяць усё прама да трактара. Кормяць смачна, — расказвае мужчына. - Цяпер на гэтым полі я сею кукурузу на сілас. Уся праца аграрыяў адказная, тут нельга вылучыць нешта важнейшае. Сытыя жывелы, хлеб на сталах людзей - асноўныя задачы нашай працы ў палях».

За ходам вясновых палявых работ у «Круглянскім Рассвеце» пільна сочыць галоўны аграном Сяргей Астроўскі. Раллі ў гаспадарцы больш за 3,6 тыс. га. Сёлета ў іх лік увайшлі 300 га, якія змянілі сваё прызначэнне: раней тут сеялі травы, а зараз гэтыя землі перавялі ў ворыва, а таксама ўзаралі закінутыя ўчасткі, прыбралі хмызнякі. Тэхнікі, гаворыць ён, дастаткова, людзі ў гаспадарцы гатовы працаваць і дасягаць высокіх вынікаў. «Працы ідуць актыўна. Вільгаць з глебы сыходзіць хутка, калі мы зараз не пасеем у аптымальна сціснутыя тэрміны, выніку не атрымаем, а нам такога раскладу дапусціць нельга, - распавядае ён. - Ад нашай працы залежыць эканоміка гаспадаркі. Калі мы ў працэсе не ўнеслі патрэбных угнаенняў, не выканалі нешта з тэхналагічных патрабаванняў, а ў далейшым не пасеялі культуры ў аптымальна сціснутыя тэрміны, усе затраты, якія панесла гаспадарка, будуць марна. Нам патрэбен надзейны вынік. І мы ўсё робім для таго, каб пасяўная прайшла на высокім узроўні, граматна і ў тэрмін».

Задачы перад аграрыямі і праўда стаяць сур'ёзныя. Фарміраванне якаснай і дастатковай кармавой базы - адна з іх. Толькі ў гаспадарцы пагалоўе буйной рагатай жывёлы складае больш як 4 тыс., з якіх амаль 1,3 тыс. - дойны статак. «І ўсім патрэбны якасны корм у дастатковай колькасці», - падкрэсліў галоўны аграном.

Як адзначыў намеснік начальніка ўпраўлення па сельскай гаспадарцы і харчаванні Круглянскага райвыканкама Юрый Яўсееў, да работы ўсе падыходзяць адказна і з усведамленнем таго, што ад яе залежыць не толькі вынік канкрэтнай гаспадаркі, але і ўсяго раёна, а таксама вобласці. «Цяпер асноўны акцэнт на кукурузе: да 20 мая гэту работу мы павінны завяршыць, каб потым дружна ўступіць у корманарыхтоўку, - расказаў ён. - Насенным матэрыялам забяспечаны ўсе гаспадаркі, угнаенні таксама ёсць, тэхніка, людзі - усё гатовы ўкласціся ў тэрмін».

Ідуць у раёне і працы па сяўбе аднагадовай і шматгадовай травы. Зараз тут, як і ва ўсім рэгіёне, пашырылі пляцы пад бяспокрыўны спосаб пасева травы. «Гэтую працу будзем працягваць. Так сеем люцэрну і канюшыну, - распавёў Юры Яўсееў. - Такі спосаб пасева рэзультатыўны тым, што гэтыя травы будуць убірацца ўжо сёлета. А гэта значыць, што кармавая база стане лепшай. Пры покрыўным спосабе мы маглі выкарыстоўваць такую траву толькі ў наступным годзе».

Шматгадовая і аднагадовая трава, кукуруза на сілас - незаменная кармавая база, а таксама бялковыя дадаткі да кармоў. Пагалоўе БРЖ у раёне складае больш за 23 тыс., з якога 7,6 тыс. - дойны статак. «У гэтым годзе нам неабходна нарыхтаваць 24 кармавыя адзінкі на адну ўмоўную галаву. Гэта каля 7 тыс. т сена, 80 тыс. т сенажу і 82 тыс. т сіласу», - падкрэсліў ён.

Аграрыі ўпэўнены: работа ў палях - аснова харчовай бяспекі, а таксама магчымасць у будучым атрымаць прыбытак ад экспарту.

БЕЛТА