Чыгірынскі турыстычны кластар плануюць стварыць у Магілёўскай вобласці

Чыгірынскі турыстычны кластар плануюць стварыць у Магілёўскай вобласці. Пра гэта расказаў Яўген Якімаў – дырэктар ААТ «Магілёўскае Агенцтва рэгіянальнага развіцця», якое зараз займаецца стварэннем інфармацыйнай базы даных турыстычнага і інвестыцыйнага патэнцыялу Чыгірынскага вадасховішча і прылеглых да яго тэрыторый.

Знаходзіцца Чыгірынскае вадасховішча на мяжы Кіраўскага і Быхаўскага раёнаў у пойме ракі Друць. У цяперашні час вакол яго зарэгістравана і дзейнічае больш за сорак аграэкасядзіб і столькі ж баз адпачынку.

У працу на першым этапе стварэння кластара ўцягнуты профільныя структуры і ведамствы – абласное ўпраўленне спорту і турызму, Кіраўскі і Быхаўскі райвыканкамы, ААТ «Магілёўаблтурыст», студэнты профільных ВНУ, інстытут менеджменту і турызму, Федэрацыя туріндустрыі. Іх задача–выпрацоўка алгарытму дзеянняў і збор варыянтаў развіцця кластара, якія будуць прааналізаваны спецыялістамі. Яго канчатковая мэта–стварэнне на «Чыгірынцы» турысцка-рэкрэацыйнай зоны з асаблівым статусам. Наступны крок– распрацоўка бізнес-праекта з планам інвестыцый, прэзентацыя якога будзе праходзіць на мясцовых бізнес-форумах. Паралельна прапрацоўваюцца варыянты ўключэння ў працу па стварэнні кластара мясцовага насельніцтва.

– Кластар вакол Чыгірынскага вадасховішча–гэта прыклад рэгіянальнай турыстычнай кааперацыі, калі кожны з суб’ектаў, які ў яго ўваходзіць, прапаноўваючы кліенту свае паслугі, прадастаўляе ўвесь пералік магчымасцяў гэтай тэрыторыі, – растлумачыў Яўген Якімаў.

Паводле яго слоў, зараз збіраюцца прапановы і пажаданні рыбакоў, уладальнікаў баз адпачынку і аграэкасядзіб, якія будуць выкарыстаны пры распрацоўцы праекта. Вывучаецца станоўчы вопыт рэалізацыі аналагічных праектаў у краіне і за яе межамі.

mogilevnews.by