Дэкада кібербяспекі праходзіць у Магілёве

Супрацоўнікі Ленінскага РУУС праводзяць у Магілёве дэкаду кібербяспекі. Пра гэта паведамілі ў УУС Магілёўскага аблвыканкама.

У цэлым у Магілёўскай вобласці адзначаецца зніжэнне колькасці кіберзлачынстваў, але пры гэтым узрос іх цяжар. Супрацоўнікі аддзялення па супрацьдзеянні кіберзлачыннасці Ленінскага РУУС Магілёва звязваюць гэта з развіццём лічбавых тэхналогій, электронных паслуг і адсутнасцю ў грамадзян базавых навыкаў абароны асабістай інфармацыі і звестак аб тым, як паводзяць сябе злачынцы ў лічбавым асяроддзі.

Прафілактычная акцыя «Дэкада кібербяспекі» праводзіцца для павышэння ўзроўню лічбавай і інфармацыйнай граматнасці насельніцтва, навыкаў абароны асабістай інфармацыі і для зніжэння колькасці такіх злачынстваў у Ленінскім раёне абласнога цэнтра. Супрацоўнікі праваахоўных органаў наведаюць прадпрыемствы і арганізацыі, навучальныя ўстановы раёна, дзе раскажуць, як не стаць ахвярай махляроў. Асаблівую ўвагу ў прафілактычнай рабоце яны нададуць найбольш неабароненым слаям насельніцтва – навучэнцам і пенсіянерам.

Даведацца, як не патрапіць у пастку кіберзлачынцаў, можна будзе дзякуючы сацыяльным ролікам і тэматычным улёткам, якія будуць распаўсюджвацца ў магазінах, паліклініках, грамадскім транспарце і іншых месцах з вялікай колькасцю людзей.

Прафілактычная акцыя будзе доўжыцца да 30 верасня.

БЕЛТА